ރައްޔިތުންނާއި ސަރުކާރާ ދޭތެރެއަށް ހުރަސްތައް ކުރިމަތިވާނެ ފުރުސަތު ކައުންސިލް އިންތިޚާބުގައި ނުދެއްވުމަށް ރައީސުލްޖުމްހޫރިއްޔާ އަދި ޕީއެންސީގެ ލީޑަރު ޑރ. މުޙައްމަދު މުޢިއްޒު ވިދާޅުވެއްޖެއެވެ.
ކޮންގްރެސް ޕާޓީގެ ޚާއްޞަ ކެމްޕޭން ހަރަކާތުގައި ވާހަކަފުޅުދައްކަވަމުން ރައީސް ވިދާޅުވީ، މި ސަރުކާރަކީ ރައްޔިތުންގެ ފަޅީގައި އޮތް ސަރުކާރެއް ކަމަށާއި، މި ސަރުކާރު އޮތީ ރައްޔިތުންނާއި އެކުގައި ކަމަށެވެ. އެހެންކަމުން ރައްޔިތުންނާއި ސަރުކާރާއި، މެދަށް އިދިކީލަ ވިސްނުންތައް ވައްދަން ފުރުސަތު ނުދެއްވުމަށް ރައީސް ވަނީ އިލްތިމާސް ކުރައްވާފައެވެ.
”ރައްޔިތުންނާއި ބައްދަލުކޮށް، ރައްޔިތުންގެ އަޑު އަހައި، ރައްޔިތުންގެ ވިންދާއި އިހުސާސްތައް ގާތުން ދެނެގަނެ، އެއާ އެއްގޮތަށް ކަންކަން ކުރާ ސަރުކާރެއް، އެހެންވީމަ ރައްޔިތުންނާއި ސަރުކާރާއި މެދަށް އިދިކީލަ ވިސްނުންތަކެއް ނުވައްދަވާށޭ، ވައްދަން ފުރުސަތު ނުދެއްވާށޭ، ސިޔާސީ ސަކަރާތް ޖެހުމާއި، ސިޔާސީ ޖަގަޑާ ހެދުމާއި، އެކި ކަހަލަ ގޮތްގޮތުން ރައްޔިތުންނާއި ސަރުކާރާ ދޭތެރެއަށް ހުރަސްތަކެއް ކުރިމަތިވާނެ ފުރުސަތު ކައުންސިލް އިންތިހާބުގައި ނުދެއްވާށޭ، މި ސަރުކާރު މި އޮތީ އަޅުގަނޑުމެންގެ ރައްޔިތުންނާއި އެކީގައި“ ރައީސް ވިދާޅުވިއެވެ.
މިމޭރުމުން ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ވެވަޑައިގެންނެވި ވަޢުދުފުޅުތައް ހުރީ ލިޔެވިފައި ކަމަށާއި، ކަންކަން ބާރު ސްޕީޑްގައި އެކި މަރުހަލާތަކުގައި ކުރިއަށް ދާނެ ކަމަށެވެ. އަދި ކައުންސިލަށް ހޮވަންވީ މިކަންކަމުގައި ހިފައި، މިކަންކަމުގައި ބާރު އަޅައިދީ، ހިތްވަރުދީ މަގުފަހިކޮށްދޭނެ ބައެއް ކަމަށްވެސް ރައީސް ވިދާޅުވިއެވެ.
އެެކަމަށް ހުރަސް އަޅައި، އެކި ކަހަލަ އުޒުތައް ދަައްކައި، އެކި ކަހަލަ ހުރަސްތައް ކުރިމަތިކޮށް، ތަރައްގީ މަޑުޖައްސަން، މުޖުތަމައުގެ ހަމަނުޖެހުން އަނބުރާ ގެނެސްދޭނެ ބައެއް ނުހޮވުމަށް ރައީސް މުޢިއްޒު އެދިވަޑައިގެންނެވިއެވެ.
މިސަރުކާރުން ރާއްޖޭގެ މުޖުތަމައުއަށް މިހާރު ހަމަޖެހުން ގެނެސްދެވިފައިވާކަން ފާހަގަކުރައްވާ ރައީސް ވިދާޅުވީ، ރާއްޖޭގައި ސިޔާސީ ކުށްވެރިން ނުތިބޭނެ ކަމަށާއި ސިޔާސީ ގޮތުން އެއްވެސް މީހަކު ޖަލަށް ލާފައި ނުވާނެ ކަމަށެވެ. އަދި މި ޤައުމުގައި އެއްވެ އުޅުުމުގެ ފުރުސަތު އެހެން ހުރިހާ ކަމެއް ކުރިއަށްވުރެ އިތުރުކޮށްދީފައިވާނެ ކަމަށާއި މި ހުރިހާ ހަމަޖެހުމެއް ގައުމުގައި އެބަ އޮތް ކަމަަށްވެސް ރައީސް ވިދާޅުވިއެވެ.
”މި ހުރިހާ ހަމަޖެހުމެއް ޤައުމުގައި އޮއްވާ ރަށެއްގައި ސިޓީއެއްގައި ސަކަރާތް ޖަހައި، ރައްޔިތުންގެ ތެރޭގައި ސަރުކާރުން ކުރިއަށް ގެންދަން އުޅޭ ކަންކަމުގައި ހުރަސްތައް ކުރިމަތި ކުރުވައި، ހަމަނުޖެހުން އުފައްދައި ތަރައްޤީ މަޑުޖައްސުން ފަދަ ކަންކަން ކުރަން ޖާގަ ދިނުމަކީ އެއްވެސް ރައްޔިތަކު ކުރައްވާނެ ކަމެއް ނޫން“ ރައީސް ވިދާޅުވިއެވެ.
ރައީސް ވިދާޅުވީ ތަރައްޤީއަށް ހުރަސްއެޅުމަށް އިދިކޮޅުފަރާތްތަކަށް ޖާގަ ނުދެއްވުމަށެވެ. އަދި ރައްޔިތުންނާއި އެކީގައި މި އޮތް ސަރުކާރު، ރައްޔިތުންނާއި އެކީގައި ހިތްވަރާއެކު ކުރިއަށް ވަޑައިގަތުން ކޮންގްރެސްޕާޓީގެ ފަރާތުން ކުރިއަށްއޮތް ލޯކަލް ކައުންސިލް އިންތިޚާބަށް ކުރިމަތިލާފައިވާ 1300 އަށްވުރެ ގިނަ ކެންޑިޑޭޓުން ހެޔޮހިތުން ބަލައިގަނެ ހޮއްވަވައިދެއްވުމަށްވެސް ރައީސް މުޢިއްޒުވަނީ އިލްތިމާސް ކުރައްވާފައެވެ.
