ދިވެހިން ތިބީ ޤައުމީ ފުޓްސަލް ޓީމާއެކުގައި ކަމަށް ރައީސުލްޖުމްހޫރިއްޔާގެ ނައިބު، އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މި މޭރުމުން ވިދާޅުވީ ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ. އެމަނިކުފާނު ވިދާޅުވީ ދިވެހިން ތިބީ ޤައުމީ ފުޓްސަލް ޓީމާއެކުގައި ކަމަށާއި، އެހެން ފަހަރުތަކެކޭ އެއްފަދައިން، ކުޅިވަރުގައި ދިވެހިން ދައްކާ އެއްބައިވަންތަކަމުގެ ރިވެތި ސިފަ މި ފަހަރު ވެސް ފެނިގެންދާނެ ކަމަށެވެ.
ސޯޝަލް މީޑިއާގެ އެކި ޕްލެޓްފޯމްތައް މެދުވެރިކޮށް ޤައުމީ ޓީމާއެކު ދިވެހިން ތިބިކަން ހާމަކުރަމުންދާކަން ފާހަގަކުރައްވަމުން ނައިބު ރައީސް ވިދާޅުވީ، ދިވެހި ޓީމާ މެދު ދިވެހިންގެ އުއްމީދުތައް ހުރި މިންވަރު އެކަމުން އެކަނި ވެސް ހާމަވެގެންދާ ކަމަށެވެ. އަދި ހަމައެހެންމެ، ތަށްޓާއެކު ޤައުމީ ޓީމުން އެނބުރި ރާއްޖެ އަންނައިރު، ޓީމަށް މަރުޚަބާ ކިޔުމަށް ދިވެހިން ތައްޔާރުވެގެން ތިބޭނެ ކަމަށް އެމަނިކުފާނު ވިދާޅުވިއެވެ.
”އިރާދަކުރެއްވިޔާ މި ފަހަރު ވެސް އަޅުގަނޑުމެންގެ ރާއްޖެއިން ދައްކައިދޭނެ، އެކި ކަންކޮޅުތަކުން ދިވެހި ޓީމާއެކު އޮތްކަމުގެ ޝުއޫރުތައް އެބަ ފާޅުކުރަމުންދޭ. މުޅި ރާއްޖޭގެ ނޫސްތަކުގައި، މީޑިއާގައި، ސޯޝަލް މީޑިއާގައި މިއޮތީ އެ ވާހަކަ. އެހެންވީމަ އަޅުގަނޑުމެންނަށް އެބަ އެނގޭ ދިވެހިންގެ އުއްމީދުތައް ހުރިވަރު. ދިވެހި ކުޅުންތެރިންވީ ތިގޮތުގައި، ތި ސާބިތުކަންމަތީގައި ތަށި ހިފައިގެން ރާއްޖެ އަންނަން. އަޅުގަނޑުމެން މި ތިބީ ހޫނު މަރުހަބާއެއް ގައުމީ ޓީމަށް ކިޔަން ތައްޔާރަށް. ދިވެހި ރައްޔިތުން އެ ތިބީ އެކަމަށް ކެތްމަދުވެފައި،“ — ނައިބު ރައީސް ވިދާޅުވިއެވެ.
ސާފް ފުޓްސަލް ޗެމްޕިއަންޝިޕްގެ ތަށްޓާއެކު ޤައުމީ ޓީމުން އެނބުރި ރާއްޖެ އަންނާނެ ދުވަހެއްގެ އިންތިޒާރުގައި މުޅި ޤައުމު އޮތްއިރު، މުބާރާތުގެ ޗެމްޕިއަންކަން ކަށަވަރުކުރުމަށް ރާއްޖެއަށް ބޭނުންވަނީ ކުރިއަށް އޮތް ދެ މެޗުގެ ތެރެއިން ކޮންމެ ވެސް އެއް މެޗަކުން މޮޅުވާށެވެ.
މި މުބާރާތުގައި ރާއްޖެއިން ބޫޓާނާ ދެކޮޅަށް ކުޅޭ މެޗުން މޮޅު ހޯދައިފިނަމަ ރާއްޖެއަށް ޗެމްޕިއަންކަން ކަށަވަރުވާނެއެވެ. ރާއްޖެއިން ބޫޓާނާ ދެކޮޅަށް ކުޅޭ މެޗު އޮންނާނީ މިއަދު ހަވީރު 15:00 ގައެވެ.
