އިސްލާމް މާއްދާ ދިވެހިން ކިޔަވައިދީގެން ކުދިންގެ މެދުގައި ދީނީ ލޯބި އުފެދޭ ތަނެއް މިހާރު ނުފެންނަ ކަމަށް، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ. ފައްޔާޒް މިފަދައިން ވިދާޅުވީ އޭނާގެ އެކްސް އެކައުންޓުން ކުރެއްވި ޕޯސްޓެއްގައެވެ.
މިވީހާ ދުވަހު ރާއްޖޭގައި އިސްލާމް މާއްދާ ދިވެހިން ކިޔަވައިދެމުން ގޮސްފައިވާއިރު، މީގެކުރިން އެއްވެސް ބަޔަކު މިފަދައިން ކަންބޮޑުވުން ފާޅުކޮށްފައިނުވެއެވެ. ރާއްޖޭގައި މިހާރު އިނގިރޭސި މީޑިއަމަށް ކިޔަވައިދެމުންދާއިރު، އަހަރުމެންގެ މާދަރީބަސް ކަމުގައިވާ ”ދިވެހި ބަހުން“ މި ކިޔަވައިދެނީ އެންމެ 2 މާއްދާއެވެ. އެއީ ދިވެހިބަސް، އަދި އިސްލާމް މާއްދާއެވެ.
މާދަރީ ބަހުން އިސްލާމް މާއްދާ ކިޔަވައިދޭތީ ކަންބޮޑުވުން ފާޅުކުރަމުން ފައްޔާޒް ވިދާޅުވީ ދިވެހިބަސް ކުރިއެރުވުމުގެ މުހިންމު ބޭނުމަށްޓަކައި އަލަށް އުނގެނެން ފަށާ ކުދިންނަށް އިސްލާމް ދީން ފަހުމުނުވާނެ ހާލަތެއްގައި އޮތުމަކީ އެ ކުދިން ބޮޑުވަމުން އަންނައިރު ދީން ދެކެ ލޯބި އުފެދި، ހެޔޮ މުސްލިމަކަށްވުމަށް އެޅެންޖެހޭ ބިންގާ އެޅުމުގައި ބޮޑު ހުރަހަކަށް ވާނެކަމަށެވެ. އަދި އެއީ މާދަރީބަސް ކުރިއެރުވުމުގެ ބޭނުމުގައި ކުރެވިދާނެ އަދި ކުރަންހެޔޮވާވަރުގެ ކަމެއްތޯއޭ ހިތާހިތުން ސުވާލު ކޮށްލެވޭ ކަމަށްވެސް އޭނާ ވިދާޅުވިއެވެ.
އޭނާ ވިދާޅުވީ މިއަދު އެންމެ ތުއްތުކުދިންނާ ހަމައިން ފެށިގެން ގިނަ ޒުވާނުން ވެސް އެ މީހުންގެ ހުރިހާ މައުލޫމާތާއި، މުނިފޫހިފިލިވުން އަދި މުއާސަލާތު ކުރުމުގައި އަދި ވިސްނުމުގައި ވެސް ބޭނުންކުރަނީ އިނގިރޭސިބަސް ކަމަށާއި، މިފަދަ ހާލަތަކަށް ދިޔައީ އިންޓަނެޓުގެ ޒަރިއްޔާއިން މުޅި ދުނިޔެ ބަވަނަވެ ގުޅިލާމެހުމުގެ ސަބަބުން ކަމަށެވެ.
ދިވެހި ބަސް ސަލާމަތްކޮށް ދިރުވާ އާލާކުރުން ވަރަށް މުހިންމުކަން ފާހަގަކުރައްވަމުން ފައްޔާޒު ވިދާޅުވީ އެއަށްވުރެެ އަދި މުހިންމީ އަޅުގަނޑުމެންގެ ދަރިން އަދި މި ޤައުމުގެ މުސްތަޤުބަލު ކަމަށްވާ ޒުވާނުން ގެ ހިތުތެރޭ އިމާންތެރިކަން ކަށަވަރުކުރެވި، ކީރިތި ރަސޫލާގެ މިސާލުން ދިރިއުޅޭ މުޖުތަމައުއެއް ކަށަވަރުކުރުން ކަމަށެވެ. އެހެންނަމަވެސް މިއަދުގެ ހާލަތުގައި އިސްލާމް މާއްދާ ދިވެހި ބަހުން ކިޔަވާދީގެން އެކަން ވާތަން ނުފެންނަ ކަމަށާއި، އަދި ކުދިންގެ ކިބައިގައި އިސްލާމް ދީނަށް އޮންނަންވީ ލޯތްބާއި އިހުތިރާމު ކުޑަވުމާއި ގެއްލުމުގެ ބިރު ވަރަށް ބޮޑުކަމަށްވެސް ފައްޔާޒް ވިދާޅުވިއެވެ.
މިއާއިއެކު ފައްޔާޒުވަނީ އިސްލާމީ އަޤީދާ އާއި މުސްލިމަކަށްވުމުގެ ޒިންމާ ފަހުމުވާނޭ އެންމެ ރަނގަޅު ސިޔާސަތުތަކެއް އެކުލަވާލަން ގޮވާލާފައެވެ.
https://twitter/faya_i/status/2014618498513645704
ފައްޔާޒް އިތުރަށް ވިދާޅުވީ ދިވެހި ބަސް ކުރިއެރުވޭނީ އިސްލާމް މަައްދާ އަދި ސައިންސް މާއްދާ ދިވެހި ބަހުން ކިޔަވަދީގެނެއް ނޫން ކަމަށާއި، އެކަންކުރެވޭނީ ލިޔުންތެރިންނަށް ފަހި ވަރުގަދަ މާހައުލެއް ޤާއިމުކޮށްގެން ކަމަށެވެ. އަދި ދިވެހި އަދަބީ އުފެއްދުންތަކަށް ރަނގަޅު ފުރުސަތުތަކެއް އުފައްދައިދީ އާމްދަނީ ލިބެނޭ މަގު ތަނަވަސް ކޮށްދީ، ތުއްތު ކުދިން އަދި ޅަ ޒުވާނުން ގަޔާވާފަދަ ފިލްމް، ގޭމްސް، ފޮތް ފަދަ ތަކެތި ދިވެހި ބަހުން އުފެއްދޭނެ މާހައުލެއް ގާއިމުކޮށްގެން ކަމުގައި ފައްޔާޒް ވިދާޅުވިއެވެ.
ފައްޔާޒް ވިދާޅުވީ އެއީ އޭނާގެ އަމިއްލަ ޚިޔާލުކަމަށާއި، އެކަންބޮޑުވުން ހިއްސާކުރެއްވީ އްގޮތަކަށްވެސް އެހެން ބޭފުޅުންގެ ވިސްނުމާއި ޖަދަލުކުރުމުގެ ނިޔަތުގައި ނޫންކަމަށެވެ.
ކަންބޮޑުވުން ފާޅުކުރީ ޒުވާނުން ދީނާ ދުރަށްދާތަން ފެންނަމުންދާކަމުގެ ކަންބޮޑުވުން އޮތީމައެވެ. އަދި ޅަ ދަރިންނަށް މިހާރުގެ ކަރިކިއުލަމްގެ ތެރެއިން ދީނީ ލޯބި އުފެދޭތަން ނުފެންނާތީ އޮތް ކަންބޮޑުވުމުގެ ސަބަބުންނެވެ. ފައްޔާޒް ވިދާޅުވިއެވެ.
އިސްލާމް މާއްދާ ކިޔަވައިދޭގޮތަށް ފާޑުވިދާޅުވަމުން ފައްޔާޒް ވިދާޅުވީ ކަރިކިއުލަމްގެ މައްސަލަތަކުގެ އިތުރުން ކުދިންނަށް ފަހުމުނުވާކަމަށެވެ. އަދި
މި މައްސަލައަކީ ރުޅިވެރިކަމެއްނެތި މުޅި މުޖުތަމައު ބަހުސްކޮށް ރަނގަޅުގޮތެއް ހޯދޭތޯއުޅެން މުހިއްމު މައްސަލައެއްކަމަށްވެސް ފައްޔާޒަށް ވިސްނޭކަމަށް އޭނާ ވިދާޅުވިއެވެ.
