ގްރޭޓަރ މާލެ ސަރަޙައްދުގެ ބޯހިޔާވަހިކަމުގެ މައްސަލައަށް ހައްލެއް ހޯދުމަށް ސަރުކާރުން ކުރިއަށްގެންދާ މަޝްރޫޢުތަކުގެ ތެރެއިން، ބޭންކް އޮފް މޯލްޑިވްސް (ބީއެމްއެލް) އާ ހަވާލުކޮށްގެން ތަރައްގީކުރާ 3،272 ހައުސިން ޔުނިޓްގެ އަމަލީ މަސައްކަތް މި މަހުގެ ތެރޭގައި ފެށުމަށް ހަމަޖެހިފައިވާ ކަމަށް ހައުސިންގ މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެއެވެ. މިނިސްޓަރ މިފަދައިން ވިދާޅުވީ ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމްގައި ވާހަކަދައްކަވަމުންނެވެ.
ރައީސް މުޢިއްޒުގެ ސަރުކާރުން މިއަހަރުގެ ތެރޭގައި ޖުމްލަ 12،000 ހައުސިން ޔުނިޓެއްގެ މަސައްކަތް ފެށުމަށް އަމާޒު ހިފާފައިވާކަން ފާހަގަކުރައްވާ މިނިސްޓަރ ވިދާޅުވީ ބީއެމްއެލްއާ ހަވާލުކޮށްގެން ކުރިއަށްގެންދާ މި މަޝްރޫއަކީ އޭގެ ތެރެއިން އެންމެ ފުރަތަމަ ޢަމަލީ މަސައްކަތް ފެށޭ މަޝްރޫޢު ކަމަށެވެ. މަޝްރޫޢު މިމަހު ފެށިގެންދާއިރު އެ ފޭސްގައި 3،300 ހައުސިން ޔުނިޓް އަޅަން ސަރުކާރުން ވަނީ ނިންމާފައެވެ.
5-6% ކުޑަ ޕްރޮފިޓް މާޖިންއެއްގައި ބޭނުންކުރަން މި މަސައްކަތް ކުރަނީ. މި 3300 ޔުނިޓްގެ މަސައްކަތް ބާރަށް ކުރިއަށްދޭ. މި މަސައްކަތުގެ ސައިޓް މަސައްކަތް މިމަހު ފަށާނެ. 2 އަހަރުން މަސައްކަތްތައް ނިންމާ މީހުން ވެއްދޭނަކަމަށް އުއްމީދަކީ. މުއްތަލިބް ވިދާޅުވިއެވެ.
މި މަޝްރޫޢުގެ ދަށުން ވިލިމާލޭގައި 312 ޔުނިޓް، ހުޅުމާލެ ފޭސް 1 ގައި 546 ޔުނިޓް އަދި ހުޅުމާލެ ފޭސް 3 ގައި 2،414 ޔުނިޓް ތަރައްޤީކުރުމަށް ވަނީ ހަމަޖެހިފައެވެ. ސަރުކާރުން ބޭންކުތަކުގެ އެހީގައި މި މަސައްކަތް ކުރަން ޖެހުނީ އިގްތިސާދީ ހާލަތު ހުރިގޮތުން ބޭރުގެ ލޯނު ހޯދުމުގައި ހުރި ދަތިތަކާ ހުރެކަމަށް މިނިސްޓަރ ފާހަގަކުރެއްވިއެވެ. ސަރުކާރުން އުންމީދަކީ މި މަޝްރޫޢުގެ ދަށުން އިމާރާތްކުރާ ފްލެޓްތައް ދެ އަހަރު ދުވަހުގެ ތެރޭގައި ނިންމައި، މީހުންނަށް ދިރިއުޅެން ފެށޭވަރު ވުމެވެ.
