ކުރީގެ އިންފޮމޭޝަން ކޮމިޝަނަރު ކަމުގެ މަގާމުވެސް ފުރާފައިވާ، ރާއްޖެޓީވީގެ ކުރީގެ ނޫސްވެރިޔާ ހުސައިން ފިޔާޒު މޫސާ ހިންގާ އަދަދު ނޫހުން ސަރުކާރަށް ފާޑުކިޔުމުގެ ނަމުގައި އިސްލާމްދީނަށް ހަޖޫޖަހާ ކާޓޫނު ކުރަހާ އާންމުކޮށްފިއެވެ.
ރައީސް ޑރ މުޙައްމަދު މުޢިއްޒުގެ ސަރުކާރާ ދެކޮޅު އެޑިޓޯރިއަލް ސިޔާސަތެއް ގެންގުޅޭ ކަމަށް މީގެކުރިން އަމިއްލައަށް އެއްބަސްވެފައިވާ އަދަދު ނޫހުން ސިޔާސީ ފާޑުކިޔުމުގެ ނަމުގައި އިންސާނުންގެ ސޫރައަށް ހަޖޫޖަހާ ސިޔާސީ ކާޓޫނުތަކެއް ކުރަހަމުން އައިސް އެންމެ ފަހުން މިވަނީ ހައްދުން ނައްޓާފައެވެ. އަދަދު ނޫހުން މިފަހަރު ކުރަހާފައިވަނީ ނަމާދުކުރާ މީހެއްގެ ޖީބުން މީހަކު ފައިސާ ވަގަށްނަގާ ގޮތަށް ހުރި ކާޓޫނެކެވެ.
އިސްލާމްދީނަށް ފުރައްސާރަކޮށް ކާޓޫނު ކުރެހި މައްސަލާގައި ވަރަށް ގިނަ ރައްޔިތުން ވަނީ އަދަދު ނޫހަށް ވަރަށް ބޮޑަށް ފާޑުކިޔާފައެވެ.
ބެލެވޭ ގޮތުގައި އަދަދު ނޫހުން މިފަދަ ޢަމަލެއް ހިންގާފައިމިވަނީ، އަލަށް އެކުލަވާލި މީޑިއާ ކޮމިޝަނުން އެ ނޫހާ ދެކޮޅަށް ފިޔަވަޅެއް އަޅާތޯއެވެ. ސަބަބަކީ މީޑިއާ ކޮމިޝަން އުފެއްދުމާ ދެކޮޅަށް އަދަދުނޫސް އިސްވެއޮވެ މުޒާހަރާކުރީ، އެ ކޮމިޝަންގެ ސަބަބުން މިނިވަން ނޫސްވެރިކަމަށް ހުރަސްއެޅޭނެކަމަށްބުނެއެވެ. އެހެންނަމަވެސް މިއަދާ ހަމަޔަށްވެސް އެއްވެސް މީޑިއާއަކަށް ކޮމިޝަނުން އެއްވެސް ފިޔަވަޅެއްއަޅާފައި ނުވެއެވެ. އެހެންކަމުން އަދަދު ނޫހުން އިސްލާމްދީނަށް ފާޅުގައި ފުރައްސާރަ ކުރީ ކޮމިޝަނުން ފިޔަވަޅެއް އަޅުވަން ވެގެން ކަމުގައި ގިނަބަޔަކު ބުނަމުންދެއެވެ.
އަދަދު ނޫހަކީ އަބަދުވެސް އެމްޑީޕީކޮޅަށް ވަރަށް ބޮޑަށް ބުރަވެގެން ނޫސްވެރިކަންކުރާ ނޫހެއްކަން އާންމު ރައްޔިތުން ފާހަގަކުރެއެވެ. އަދި 2023 ވަނަ އަހަރުގެ ރިޔާސީ އިންތިހާބުގައި ރައީސް މުއިއްޒުގެ އަގު ވައްޓާލުމަށްޓަކައި ވެސް އެމަނިކުފާނުގެ ޢާއިލީ މައްސަލަތަކެއްގެ ވާހަކަ ދޮގާއި ފިތުނަ އެކުލެވޭހެން ގެނެސްދީ އަދަދު ނޫހުންވަނީ އެންޓިކެމްޕޭނުވެސް ކޮށްފައެވެ.
