އަދަދު ނޫހުން އިސްލާމްދީނަށް ހަޖޫޖަހާ ކާޓޫނު ކުރަހާ އާންމުކުރި މައްސަލާގައި މީޑިއާކައުންސިލުން އެ ކާޓޫން ކޮންޓެންޓު ފޮހެލާ، އެ ސިލްސިލާ ހުއްޓާލުމަށް އެންގުމުން އެކަން ނުކުރަން އަދަދު ނޫހުން ހުއްޖަތްދައްކާ ދީނަށް ފުރައްސާރަކުރުން ދިފާއުކޮށްފިއެވެ.
ރައީސް ޑރ މުޙައްމަދު މުޢިއްޒުގެ ސަރުކާރާ ދެކޮޅު އެޑިޓޯރިއަލް ސިޔާސަތެއް ގެންގުޅޭ ކަމަށް މީގެކުރިން އަމިއްލައަށް އެއްބަސްވެފައިވާ އަދަދު ނޫހުން ސިޔާސީ ފާޑުކިޔުމުގެ ނަމުގައި ވެރިންނަށް ފުރައްސާރަކޮށް ސިޔާސީ ކާޓޫނުތަކެއް ކުރަހަމުން އައިސް އެންމެ ފަހުން މިވަނީ އިސްލާމްދީނަށް ފުރައްސާރަކޮށްފައެވެ. އަދަދުން މިފަހަރު ކުރަހާފައިވަނީ ނަމާދުކުރާ މީހެއްގެ ޖީބުން މީހަކު ފައިސާ ވަގަށްނަގާ ގޮތަށް ހުރި ކާޓޫނެކެވެ.
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ވަނީ އެ ކޮންޓެންޓަކީ އިސްލާމް ދީނުގެ އަސާސްތަކަށް ފުށުއަރާ ކަންތައްތަކެއް ހުރި ކަމަށް ތުހުމަތު ކުރެވޭ މައްސަލައެއް ކަމަށެވެ. އެހެން ކަމުން އެ ކޮމިޝަނުން ވަނީ އެ މައްސަލައާއި ގުޅިގެން 5 ދުވަހުގެ ތެރޭގައި އެ ކޮމިޝަނަށް ޖަވާބުދާރީ ވުމަށް އެ ނޫހަށް އަންގާފައެވެ. އެހެން ނަމަވެސް އަދަދުނޫހުން ދީނަށް ފުރައްސާރަކުރިކަން ޤަބޫލުނުކޮށް ތަފާތުއެކި ހުއްޖަތްދައްކާ މިކަން ވަނީ ދިފާއުކޮށްފައެވެ.
ނަމާދު ކުރާއިރު ކޮރަޕްޝަން ފައިސާ ބަހާކަން ދޭހަވާ ފަދަ ގޮތަކަށް އާއްމު ކުރި ”ކާޓޫން“ އެއް ނެގުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން އެންގުމާ ގުޅިގެން އަދަދު ނޫހާއި އެނޫހަށް ވާގިދޭ އިދިކޮޅު ސިޔާސީ މަދު ބަޔަކު ސަރުކާރަށް ފާޑުކީނަމަވެސް، ގިނަބަޔަކު ދަނީ އަދަދުގެ މި ޢަމަލު ކުށްވެރިކޮށް އަދަދުނޫހަށް ހަރުކަށި ފިޔަަވަޅުއަޅަން ގޮވާލަމުންނެވެ.
