އަލަށް އައްޔަން ކުރެއްވި ވަޒީރުންނަށް ރުހުން ހޯއްދެވުމަށް ރައްޔިތުންގެ މަޖިލިހަށް ފޮނުއްވި މައްސަލަ އާ މެދު ގޮތެއް ނިންމުމަށް ފޮނުވި މައްސަލަ ދިރާސާކޮށް ގޮތެއް ނިންމުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވައިފިއެވެ.
ވަޒީރުންގެ މަޖިލިހަށް މިދިޔަ މަހުގެ 30 ވަނަ ދުވަހު ބަދަލު ގެނެސްފައި ވަނީ އެ ދުވަހު ބޭއްވި އެ މަޖިލިހުގެ ބައްދަލުވުމަކަށް ފަހުގައެވެ.
އެ ބަދަލާ އެކު ފޮރިން މިނިސްޓަރު ކަމުގައި ހުންނެވި މޫސާ ޒަމީރު ފިނޭންސް މިނިސްޓަރުގެ މަގާމަށް، ހެލްތު މިނިސްޓަރުގެ މަގާމުގައި ހުންނެވި ޑރ. އަބްދުالله ހަލީލު ފޮރިން މިނިސްޓަރަކަށް އަދި ރައީސް އޮފީހުގެ ޕްރިންސިޕަލް ސެކްރެޓަރީ ޓު ދަ ޕްރެސިޑެންޓް އޮން ޕަބްލިކް ޕޮލިސީގެ މަގާމު ފުރުއްވަމުން ގެންދެވި އަބްދުﷲ ނާޒިމް އިބްރާހިމް ހެލްތު މިނިސްޓަރަކަށް އެ ދުވަހު އައްޔަންކުރެއްވިއެވެ.
އެ ބަދަލާ ގުޅިގެން މިނިސްޓަރުންގެ ގޮތުގައި މިނިސްޓްރީތަކަށް އައްޔަންކުރެއްވި ބޭފުޅުންނަށް ރުހުން ހޯއްދެވުމަށް ރައްޔިތުންގެ މަޖިލިހުގެ މިއަދުގެ ޖަލްސާއަށް ރައީސް ޑރ. މުހައްމަދު މުއިއްޒު ވަނީ ފޮނުއްވާފައެވެ.
ޖަލްސާގައި ވަނީ އެ މައްސަލަ އާ މެދު ގޮތެއް ދިރާސާކޮށް ގޮތެއް ނިންމުމަށް ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުވާފަ އެވެ. މިނިސްޓަރުންނަށް ރުހުން ދޭނީ އެ ކޮމިޓީން ގޮތެއް ނިންމުމަށް ފަހު މަޖިލިހުގެ ތަޅުމަށް ހުށަހެޅުމުން ވޯޓަށް އަހައިގެންނެވެ.
