ލ. ގަމުގައި ސްކޫލު ދަރިވަރަކު ބަރަހަނާކޮށް, ވީޑިއޯއާއެކު ބްލެކްމެއިލް ކުރި މައްސަލަ ފުލުހުން ބަލަން ފަށައިފިއެވެ.
މީޑިއާތަކަށް މިއަދު ފޮނުވި މެސެޖެއް ގައި ފުލުހުން ބުނެފައިވަނީ އެ މައްސަލަ ފުލުހުންގެ ސަމާލުކަމަށް އައިސްފައިވާ ކަމަށެވެ. އަދި ކަމާއި ގުޅުން ހުރި އިދާރާތަކާ ގުޅިގެން މިކަމާ ގުޅޭ މައުލޫމަތު ހޯދުމުގު މަސައްކަތް ކުރަމުންދާ ކަމަށްވެސް ފުލުހުން ބުންޏެވެ.
ރޭގައި ފެންމަތިވި މި މައްސަލަ، ފޭސްބުކްގައި ދައުރުވަމުންދާ ޕޯސްޓްގައި ބުނެފައިވަނީ ހަމަދް ބިން ހަލީފާ އަލް ޘާނީ ގައި ކިޔަވަމުންދާ ދަރިވަރަކު ދިރިއުޅޭ ގެއަށް އެހެން ދަރިވަރުންތަކެއް ވަދެ އެ ކުއްޖާ ރަހީނުކޮށްގެން އެހެން ތަނަކަށް ގެންގޮސް ބަރަހަނާކޮށް ވީޑިއޯކޮށްފައިވާ ކަމަށެވެ. އަދި އެ ވީޑިއޯ ލީކް ކޮށްލާނެ ކަމަށް ބުނެ ބިރު ދައްކަމުންދާކަމަށެވެ.
ރަހީނުކުރި ދަރިވަރަކީ އެ ސްކޫލު ޓީޗަރެއްގެ ދަރިފުޅު ކަމަށާއި ބަރަހާނަކުރުމަށް ފަހު އެ ކުއްޖާގެ ބްލެކްމެއިލް ކޮށްފައިވާ ކަމަށް ސޯޝަލް މިޑިއާގައި ދައުރުވަމުން އަންނަ ޕޯސްޓްގައިވެއެވެ.
މިފަހުން ކުއްޖަކަށް ބުލީ ކުރި މައްސަލައެއް ފެންމަތިވިއެވެ. އޭރު އާއްމުވި ވީޑިއޯގައި ފެންނަނީ މިސްކިތެއްގެ ތެރޭގައި ކުޑަ ކުއްޖަކަށް އަނިޔާކުރާ މަންޒަރެވެ. އެ މައްސަލަ ފުލުހުން އޭރު ވަނީ ސީރިޔަސް މައްސަލައެއްގެ ގޮތުގައި ބަލާފައެވެ.
