އެމްޕީއެލް އިން ހުޅުމާލޭގައި 10 ބުރީގެ އިމާރާތެއް އަޅަން ނިންމައިފިއެވެ.
އެމްޕީއެލް އިން ކުރި އިއުލާނުގައި ވަނީ ކޮންޓްރެކްޓާ ފައިނޭންސިން އުސޫލުން ކުރިއަށް ގެންދާ އެ މަޝްރޫއުގައި، ހުޅުމާލޭ ފެރީ ޓާމިނަލްގެ ކުރިމަތިން އޮންނަ ބިމުގައި އަޅަން ނިންމާފައިވަނީ 10 ބުރީގެ ކޯޕަރޭޓް އޮފީސް އިމާރާތެއް ކަމަށެވެ.
އެމްޕީއެލްއިން ބުނީ އެ އިމާރާތް އަޅަން ބޭނުންވަނީ 100 ޕަސެންޓް ކޮންޓްރެކްޓާ ފައިނޭންސްކުރާ ގޮތަށް ކަމަށެވެ. އެ އިމާރާތް އެޅުމަށް ހޭދަވާނެ ކަމަށް އެމްޕީއެލްއިން ލަފާކުރަނީ 112 މިލިއަނާއި 161މިލިއަން ރުފިޔާއެވެ.
އެ މަސައްކަތަށް ޝައުގުވެރިވާ ފަރާތްތަކުން އެކަން ހުށަހެޅުމުގެ ފުރުސަތު މި މަހުގެ 10 ވަނަ ދުވަހާ ހަމައަށް ވަނީ ހުޅުވާލައިފައެެވެ.
އެމްޕީއެލްއިން މިހާރު އޮފީސް ހިންގަނީ ކަސްޓަމްސް ކައިރީގައި ހުންނަ އިމާރާތެއްގައި އެވެ. ނަމަވެސް މިއީ ވަރަށް ދުވަސްވީ ތަނެކެވެ.
ހުޅުމާލެއަށް އެމްޕީއެލްގެ އޮފީސް އިމާރާތް ބަދަލުކުރާ އިރު ސަރުކާރުގެ ބައެއް އޮފީސްތައް ވެސް މިހާރު ދަނީ ހުޅުމާލެއަށް ބަދަލުކުރަމުންނެވެ.
