ބޭންކް ޓްރާންސްފާ ސައްހަނޫން ސްލިޕް ބޭނުންކޮށްގެން ވިޔަފާރިކުރާ މައްސަލަތައް އިތުރުވަމުންދާތީ އެކަމަށް ސަމާލުވާން ފުލުހުން އެދިއްޖެއެވެ.
ފުލުހުން ބުނެފައިވަނީ ފޭކް ސްލިޕްތައް ބޭނުންކޮށްގެން ވިޔަފާރިކުރާ މައްސަލަތަކާއި ގުޅިގެން ފުލުހުން ކުރިއަށް ގެންދިޔަ ތަހުގީގުތަކުން މިހާތަނަށް ގިނަ މައްސަލަތަކެއް ފާހަގަކޮށްފައިވާ ކަމަށެވެ. އެގޮތުން ތަހުގީގުތަކުން ފާހަގަކުރެވުނު ކަމަކީ ފޭކް ސްލިޕް އުފައްދާ މީހުން އެކަން ކުރަނީ ވަކި ހާއްސަ އެޕްލިކޭޝަނެއް ބޭނުންކޮށްގެންކަމަށެވެ. އަދި ހާއްސަކޮށް ރެސްޓޯރެންޓުތަކާއި ފިހާރަތަކުން ވިޔަފާރި ކުރުމަށްފަހު އަގު ދެއްކުމުގެ ގޮތުން ފޭކް ސްލިޕްތައް ފޮނުވާކަން ފާހަގަވެފައިވާ ކަމަށް ފުލުހުން ބުންޏެވެ.
އެފަދަ މައްސަލަތަކުން ރައްކާތެރިވުމަށްޓަކައި، އެކައުންޓަށް ފައިސާ ޖަމާވިކަން ޔަގީން ކުރުމަށްފަހު ނޫނީ ފައިސާގެ އެއްވެސް މުއާމަލާތެއް ނުހިންގުމަށް ފުލުހުން އިލްތިމާސް ކުރިއެވެ.
އަދި އޮންލައިން ވިޔާފާރިތައް ހިންގާ ފަރާތްތަކުންވެސް މިކަހަލަ ކަން ކަމަށް އިތުރަށް ސަމާލުވާންވެސް ފުލުހުން އިލްތިމާސް ކުރިއެވެ. އަދި އެފަދަ ކަމެއް ދިމާވެއްޖެނަމަ ލަސްނުކޮށް ރިޕޯޓު ކުރުމަށްވެސް ފުލުހުން އެދެއެވެ.
ބެންކު ޓްރާންސްފަރ ސައްހަ ނޫން ސްލިޕް ބޭނުންކޮށްގެން ވިޔަފާރިކުރާ މައްސަލަތައް އިތުރުވަނީ – ސަމާލުވޭ! https://t.co/52N5ulPXxG
— Maldives Police (@PoliceMv) September 29, 2024
މި މަހުގެ 6 ވަނަ ދުވަހުގައި ފުލުހުން ވަނީ ޑޮލަރު ވިއްކުމުގެ ސްކޭމްތައް ކުރިއަށް ދާތީ އެކަމަށް ސަމާލުވުމަށްވެސް އިލްތިމާސްކޮށްފައެވެ. އަދި ބޭރު ފައިސާ ގަނެވިއްކުމުގެ މުއާމަލާތްކުރުމުގައި އިތުބާރުހުރި ގާނޫނީ ގޮތުން ހުއްދަ ލިބިފައިވާ ފަރާތްތަކާއި މުއާމަލާތްކުރުމަށްވެސް ފުލުހުން ވަނީ ކުރިންވެސް އިލްތިމާސް ކޮށްފައެވެ.
