ޕަބްލިކް ސަރވިސް މީޑިއާ (ޕީއެސްއެމް)ގެ ހިޔާނާތުގެ މައްސަލަ އެންޓިކޮރަޕްޝަން ކޮމިޝަން (އޭސީސީ) އަށް ހުށަހަޅައިފިއެވެ.
އޮޑިޓަރ ޖެނެރަލް ޙުސައިން ނިޔާޒީ ސޮއިކުރައްވާ ބުރާސްފަތި ދުވަހު ނެރުއްވި، ޕީއެސްއެމުން ޑޮލަރު ގަތުމަށް ނެގި ފައިސާ އާއި އާމްދަނީގެ ގޮތުގައި ބަލައިގެންފައިވާ ފައިސާއާއި ގުޅޭ ހާއްސަ އޮޑިޓު ރިޕޯޓުގައި ވަނީ އެ ކުންފުނީގެ ގިނަ އަދަދެއްގެ ފައިސާ ގެއްލިފައިވާކަމަށް ބުނެފައެވެ.
އަދި ފައިސާއާއި ބެހޭ ކަންކަމުގައި އިސްކޮށް އުޅުއްވި ވެރިންގެ އަމިއްލަ މަސްލަހަތު ހިމެނޭ ފަރާތްތަކުގެ އެކައުންޓަށް މިލިއަނުން ފައިސާ ޖަމާކޮށްފައިވާކަން ވެސް އެރިޕޯޓުގައި ވަނީ ފަޅާއަރުވާލާފައެވެ.
އޮޑިޓް ރިޕޯޓުގައި ބުނެފައިވަނީ، 2017 އިން 2020 ވަނަ އަހަރުގެ ނިޔަލަށް އާމްދަނީގެ ގޮތުގައި ލިބުނު 4.23 މިލިއަން ރުފިޔާ ކުންފުނީގެ އެކައުންޓަށް ޖަމާކޮށްފައި ނުވާކަމަށާއި އެ ފައިސާގެ ތެރެއިން 4.15 މިލިއަން ރުފިޔާ އެންމެފަހުން ހަވާލުވިކަމަށް، ކުންފުނީގެ ރެކޯޑުތަކުން ދައްކަނީ އެ ކުންފުނީގެ ކުރީގެ ފައިނޭންސް ޑިރެކްޓަރ ކަމަށެވެ.
އަދި 2024 ވަނަ އަހަރު ބަލައިގެންފައިވާ 31 ހާސް ރުފިޔާ ވެސް ބެންކް އެކައުންޓަށް ޖަމާކޮށްފައި ނުވާކަން ހާމަވެފައިވާކަމަށް ރިޕޯޓުގައިވެއެވެ. އަދި ޑޮލަރު ގަތުމަށް ޖުމުލަ 5.79 މިލިއަން ރުފިޔާ ނަގާފައިވާ ކަމަށާއި އޭގެ ތެރެއިން ކުންފުންޏަށް ލިބިފައިވަނީ 1.20 މިލިއަން ރުފިޔާއަށްވާ 76 ހާސް ޑޮލަރު ކަމަށް ވެސް ރިޕޯޓުގައި ވެއެވެ.
އެ މައްސަލާގައި ފުލުހުން ބުނެފައިވަނީ، ޕީއެސްއެމްގެ ކޮރަޕްޝަންގެ މައްސަލައިގެ ރިޕޯޓު ފުލުހުންނަށް ލިބިފައިވާ ކަމަށާއި، އެފަދަ މައްސަލަތައް ބެލުމުގެ އިހުތިސާސް ލިބިފައިވަނީ އޭސީސީއަށް ކަމަށްވާތީ ފުލުހުންގެ ފަރާތުން އޭސީސީއަށް މިހާރު އެ މައްސަލަ ހުށަހަޅާފައިވާނޭ ކަމަށެވެ.
ޕީއެސްއެމުން މިދިޔަ އެޕްރީލު މަހުގެ 30 ވަނަ ދުވަހު އޮޑިޓު ކޮށްދިނުމަށް އެދިފައިވަނީ އެ ކުންފުންޏަށް ބޭނުންވާ ޑޮލަރު ގަތުމަށް އަމިއްލަ ފަރާތްތަކަށް އެކި ފަހަރުމަތިން ގިނަ އަދަދެއްގެ ފައިސާ ދިނުމަށްފަހު އޭގެ ތެރެއިން ބައެއް ފައިސާއަށްވާ ޑޮލަރު ނުލިބުމާއި ގުޅިގެންނެވެ.
މައްސަލައާ ގުޅިގެން ޕީއެސްއެމުން ލިބެންހުރި ލިޔުންތައް ބަލާ ދިރާސާކޮށް, އެތަނުގެ ކަމާ ގުޅޭ ފަރާތަކުން ވަނީ މައުލޫމާތު ސާފުކޮށްފައެވެ.
