މިމަހުގެ 27ވަނަ ދުވަހު އޮލިމްޕަހުގައި ރިލީޒްކުރި ދިވެހި ފިލްމު ކަމަނާގެ އޮލިމްޕަހުގެ ހައުސްފުލް 37 ޝޯ އަށް ފަހު ޝްވެކް ސިނެމާގައި އަޅުވާގޮތައް ހަމަޖެހިއްޖެއެވެ.
މިއަދު ވަނީ ކަމަނާ ޝްވެކްގައި އެޅުވުމުގެ އެއްބަސްވުމުގައި ސޮއިކޮށްފައެވެ. ހުޅުމާލެ ޝްވެކްގައި މި ފިލްމު އެޅުވުމަށް ހަމަޖެހިފައިވަނީ 20 ސެޕްޓެމްބަރ އިން ފެށިގެންނެވެ.
ޝްވެކް ސިންމާގައި މި ފިލްމު އެޅުވުމަށް ނިންމީ ގިނަ ބައެއްގެ އެދުމުގެ މަތިން ފިލްމް ބަލަން ބޭނުންވާ މީހުންނަށް އެ ފުރުސަތު ހޯދައިދިނުމަށެވެ.
މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު (ކިޑޫ) ޑައިރެކްޓް ކޮށްފައިވާ ‘ކަމަނާ’ އަކީ ގެވެށި އަނިޔާގެ ހަގީގީ ހާދިސާތަކެއްގެ މައްޗަށް ހަދާފައިވާ ފިލްމެކެވެ.
މި ފިލްމްގެ ލީޑް ތަރީންގެ ތެރޭގައި ހިމެނެނީ މަރްޔަމް ޢައްޒަ އާއި ޔޫސުފް ޝަފީޢުގެ އިތުރުން އާމިނަތު ރަޝްފާ (އާޝާ) އެވެ. މީގެ އިތުރުން ނަތާޝާ ޖަލީލް އާއި މުޙައްމަދު މަނިކު އާއި ދަރާ މުޙައްމަދު ރަޝީދު ފިލްމްގެ މުހިންމު ރޯލްތަކުން ފެނިގެންދާނެއެވެ. މިއީ ސެޓަރން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން އުފައްދާފައިވާ ފިލްމެކެވެ.
ބޭވަފާތެރި ފިރިއެއްގެ ސަބަބުން މާބަނޑު މީހަކަށް ކުރިމަތިލާން ޖެހޭ ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ބިނާކޮށް ހަދާފައިވާ މި ފިލްމަކީ މުޅި މުޖުތަމަޢުއަށް ދެވޭ ވަރަށް މުހިންމު މެސެޖެއް ކަމަށް ފިލްމުގެ ޕްރޮޑިއުސަރު ޝާނީޒް އަލީ ވަނީ ބުނެފައެވެ.
