އިމިގްރޭޝަނުން އިއްޔެ މާލޭގެ 5 ގެއެއް ބަލައިފާސްކޮށް 3 ބިދޭސީއަކު ހައްޔަރުކޮށްފިއެވެ.
އެ މީހުން އިމިގްރޭޝަންގެ ބެލުމުގެ ދަށަށް ގެންދިޔައީ އާންމު ރައްޔިތުންގެ ސަލާމަތާއި ރައްކާތެރިކަމަށް ބެލުމެއް ނެތި، ބިދޭސީން ދިރިއުޅެމުން އަންނަ ތަންތަން ބަލައި ފާސްކުރުމަށް ހިންގަމުންދާ އޮޕަރޭޝަންގެ ދަށުން ކަމަށް އިމިގްރޭޝަނުން ބުންޏެވެ.
އިމިގްރޭޝަނުން އާއްމުކޮށްފައިވާ ފޮޓޯތަކުން އެނގޭ ގޮތުގައި ފާސްކުރި ގެތައް ހުރީ ވަރަށް މުޑުދާރުކޮށެވެ. ނަމަވެސް ވިއްކަން ތައްޔާރުކޮށްފައި ހުރި ކަމަށް ބެލެވޭ ރިހަ އާއި ރޮށިތަކެއް ވެސް އެއިން އެއް ގޭގައި ހުއްޓެވެ. ރިހަ ހުރީ ބާޒާރު ކޮތަޅުތަކެއްގައި ބަންދުކޮށްފައެވެ.
އާންމު ރައްޔިތުންގެ ސަލާމަތާއި ރައްކާތެރިކަމަށް ބެލުމެއް ނެތި، ބިދޭސީން ދިރިއުޅެމުން އަންނަ ތަންތަން ބަލައި ފާސްކުރުމަށް ހިންގަމުންދާ އޮޕަރޭޝަންގައި 14 ސެޕްޓެންބަރު 2024 ގައި، މާލޭގެ 05 ގެއެއް ބަލައި 03 ބިދޭސީއަކު އިމިގްރޭޝަންގެ ބެލުމުގެ ދަށަށް ވަނީ ގެނެވިފައި. pic.twitter.com/m5vEXJEafH
— Maldives Immigration (@ImmigrationMV) September 15, 2024
އިއްޔެ ހިންގި މި އޮޕަރޭޝަނުގައި ތިން ބިދޭސީން ހައްޔަރު ކޮށްފައިވާއިރު، މިމަހުގެ 12 ވަނަ ދުވަހު ވެސް ކުރިއަށް ގެންދިޔަ އޮޕަރޭޝަނުގައި ފަސް ގެއެއް ބަލައި، ފަސް ބިދޭސީން ހައްޔަރު ކޮށްފައިވާ ކަމަށް އިމިގްރޭޝަނުން ވަނީ ބުނެފައެވެ.
މި ސަރުކާރުން އަންނަނީ ރާއްޖެއަށް ދިމާވެފައިވާ ބިދޭސީންގެ މައްސަލަ ހައްލު ކުރުމަށް ގިނަ ފިޔަވަޅުތަކެއް އަޅަމުންނެވެ. އެގޮތުން ބޮޑު އޮޕަރޭޝަނެއް ކުރިއަށް ގެންދާއިރު، މިހާތަނަށް 3000 އަށްވުރެ ގިނަ ބިދޭސީން އަތުލައިގަނެ ވަނީ ޑީޕޯޓް ކޮށްލާފައެވެ.
