ކުންފުނީގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު ގެނައުމުގެ ބިލު ބަލައިގަނެ އިގުތިސޯދީ ކޮމިޓީއަށް މިއަދު ފޮނުވައިފިއެވެ.

Ads by MN Maldives

ކުންފުނީގެ ގާނޫނަށް ފޭދޫ އުތުރު ދާއިރާގެ މެމްބަރު އިސްމާއިލް ނިޒާރު ހުށަހަޅުއްވާފައި ވަނީ މިދިޔަ ބުދަ ދުވަހުގެ ރޭ ބޭއްވި މަޖިލިހުގެ ދައުރުން ބޭރުގައި ބާއްވާ ފުރަތަމަ ހާއްސަ ޖަލްސާގައެވެ. އެ ޖަލްސާގައި ވަނީ ބިލުގެ ފުރަތަމަ ކިޔުން އިއްވާފައެވެ.

ކުންފުނީގެ ގާނޫނަށް ހުށަހެޅި 4 އިސްލާހަކީ:

1. ހާއްސަ އާންމު ޖަލްސާ ބާއްވަން ލިޔުން ލިބޭތާ ތިން ދުވަހުގެ ތެރޭގައި ޖަލްސާއަށް ދައުވަތު ދިނުން. އަދި 10 ދުވަހުގެ ތެރޭގައި ޖަލްސާ ބޭއްވުން.
2. ހާއްސަ އާންމު ޖަލްސާއެއް ބޭއްވުމަށް ހަމަޖެހިފައިވާ ދުވަހުގެ މަދުވެގެން ހަތް ދުވަސް ދުވަސް ކުރިން ކުންފުނީގެ މެމްބަރުންނަށް ނޯޓިސް ފޮނުވުން.
3. ގާނޫނުގައި ބަޔާންކޮށްފައި ވީނަމަވެސް އަދި އެހެން ގާނޫނެއްގައި ނުވަތަ ސަރުކާރުގެ ކުންފުންޏެއް އުފައްދާ ގާނޫނެއްގައި ނުވަތަ ކުންފުނީގެ ހިންގާ ގަވާއިދުގައި އެ ކުންފުންޏެއްގައި މަދުވެގެން ތިބެން ޖެހޭ ޑިރެކްޓަރުންގެ އަދަދު އިތުރުކުރެވުން.
4. ބަޔާންކުރާ އަދަދަށް ޑިރެކްޓަރުން ނެތް ނަމަ އަދި މެނޭޖިން ޑިރެކްޓަރަކު ނެތް ނަމަ ޑިރެކްޓަރުން ނުވަތަ މެނޭޖިން ޑިރެކްޓަރު އައްޔަންކުރަން އެންގުމުގެ ބާރު ރަޖިސްޓްރާއަށް ދިނުން. އެގޮތުން އަންގާތާ 10 ދުވަހުގެ ތެރޭގައި އެ އަދަދަށް ޑިރެކްޓަރުން އައްޔަންކޮށް، ނުވަތަ މެނޭޖިން ޑިރެކްޓަރަކު އައްޔަން ކުރުމާ އެކު އެ މައުލޫމާތު ރަޖިސްޓްރާއަށް ހުށަހެޅުން.

އެ ބިލު މަޖިލިހަށް ބަލައިގަތުމަށް 77 މެމްބަރުން ވަނީ ވޯޓު ދީފައެވެ. ނުފެންނަ ކަމަށް އަދި ވަކި ގޮތަކަށް ވޯޓު ދޭން ބޭނުންނުވާ ކަމަށް އެއްވެސް މެމްބަރަކު ވޯޓު ދީފައެއްނުވެއެވެ.