ލޯ މެޑަލް ހާސިލްކޮށް ދިވެހިރާއްޖެއަށް ރީތި ނަން ހޯދައިދިން އެތުލީޓުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތައުރީފު ވިދާޅުވެއްޖެއެވެ.
ރޭ “އެކްސް”ގައި ޝާއިއުކުރެއްވި ޕޯސްޓުގައި ހަތަރު ވަނަ ސައުތު އޭޝިއަން ޖޫނިއާ އެތްލެޓިކްސް ޗެންޕިއަންޝިޕްގައި ބްރޮންޒް މެޑަލް ހާސިލްކުރި ގައުމީ އެތުލީޓުންނަށް ރައީސް ޑރ. މުޢިއްޒު ވަނީ ސާބަހާއި މަރުހަބާ ދަންނަވާފައެވެ.
— Dr Mohamed Muizzu (@MMuizzu) September 13, 2024
މިދިޔަ ބުދަ ދުވަހުން ފެށިގެން ކުރިއަށް ގެންދިޔަ ހަތަރު ވަނަ ސައުތު އޭޝިއަން ޖޫނިއާ އެތްލެޓިކްސް ޗެންޕިއަންޝިޕް ނިންމާލާފައިވާއިރު، ރާއްޖޭގެ އަންހެން އަދި ފިރިހެން އެތުލީޓުން ވަނީ 100 މީޓަރު ރިލޭގެ ރިކޯޑު އައުކޮށް ލޯ މެޑަލް ހާސިލްކޮށްފައެވެ.
އިންޑިއާގެ ޗެންނާއީގައި ކުރިއަށްދިޔަ ހަތަރު ވަނަ ސައުތު އޭޝިއަން ޖޫނިއާ އެތްލެޓިކްސް ޗެންޕިއަންޝިޕްގައި ރާއްޖޭގެ ފަރާތުން ޖުމްލަ 16 އެތުލީޓުން ވާދަކޮށްފައިވެއެވެ. އޭގެ ތެރޭގައި ހިމެނެނީ އަންހެން 8 އެތުލީޓުންނާއި ފިރިހެން 8 އެތުލީޓުންނެވެ.
