މިރޭ ތިނަދޫ ސިޓީގައި އެޅުވުމަށް ހަމަޖެހިފައިވާ “ކަމަނާ” ފިލްމުގެ މިރޭގެ ޝޯގައި ބައިވެރިވުމަށް މަޝްހޫރު ތަރި އަދި ކަމަނާ ފިލްމްގެ ލީޑް އެކްޓަރ ޔޫސުފް ޝަފީޢު (ޔޫއްޕެ) ތިނަދޫއަށް އައުމަށް ހަމަޖެހިއްޖެއެވެ.
ޔޫއްޕެ ތިނަދޫ އަށް އައުމަށް ހަމަޖެހިފައިވަނީ މިއަދުގެ ހަވީރުގެ ވަގުތެއްގައެވެ.
“ކަމަނާ“ އަކީ އަންބެއްގެ ކެތްތެރިކަމާއި ރާއްޖޭގައި ގެވެށި އަނިޔާ ގޮސްފައި އޮތް ހިސާބު ދައްކުވައިދޭ ޙަޤީޤީ ހާދިސާއަކަށް އުފައްދާފައިވާ ފިލްމެކެވެ.
މާލޭގައި ހުރިހާ ޝޯއެއް ހައުސްފުލްކޮށް ދައްކަމުން ދާއިރު، ތިނަދޫގައި 2 ޝޯ އެއް ބޭއްވުމަށް ވަނީ ހަމަޖެހިފައެވެ. އަދި އެ 2 ޝޯ ވެސް މިހާރު ވަނީ ހައުސްފުލްވެފައެވެ.
ކަމަނާ ވެގެން ދާނީ، ރާއްޖޭގެ އެންމެ ގިނަ ރަށްތަކެއްގައި އަޅުވާ ފިލްމަކަށެވެ. އަދި ރާއްޖޭގެ ތާރީޚުގައި އެންމެ ބޮޑު އާމްދަނީއެއް ހޯދާނެ ފިލްމަށްވެސް ކަމަނާ ވެދާނެއެވެ.
ކިޑް ޕްރޮޑަކްޝަނާއި ސެޓަރން ސްޓޫޑިއޯ ހުށަހަޅައިދިން މި ފިލްމުގެ ޕްރޮޑިސަރަކީ ކާމިޔާބު ފިލްމު “ލޯބިވެވިއްޖެ” ގެ ޕްރޮޑިއުސަރ ޝާނިޒް ޢަލީއެވެ. މަހުދީ އަހުމަދު ސްކްރީން ޕްލޭ ލިޔެފައިވާ މި ފިލްމުގެ ޑައިރެކްޓަރަކީ ޙުސައިން މުނައްވަރުއެވެ.
މި ފިލްމްގެ ލީޑް ތަރީންގެ ތެރޭގައި މަރްޔަމް އައްޒައާއި ޔޫސުފް ޝަފީޢުގެ އިތުރުން އާމިނަތު ރަޝްފާ (އާޝާ) ހިމެނެވެ. މީގެ އިތުރުން ނަތާޝާ ޖަލީލާއި މުޙައްމަދު މަނިކާއި ދަރާ މުޙައްމަދު ރަޝީދު ފިލްމުގެ މުހިންމު ރޯލްތަކުން ފެނިގެންދެއެވެ.
