ނ. ހޮޅުދޫގެ ގެއެއްގެ ތެރެއިން ޒަޚަމްތަކަކާއެކު މަރުވެފައި އޮއްވާ ފެނުނު ޒަކިއްޔާ މޫސާގެ ހަށިގަނޑު ތަހުލީލުތަކަށް ފަހު އަނބުރާ ހޮޅުދޫއަށް ގެންގޮސްފިއެވެ.
ފުލުހުން މަޢުލޫމާތުދެއްވާ ގޮތުގައި ޒަކިއްޔާގެ ހަށިގަނޑު އަނބުރާ ހޮޅުދޫއަށް ފޮނުވާލާފައިވަނީ މިއަދުގެ ހެނދުނުއެވެ.
ޒަކިއްޔާގެ ހަށިގަނޑު އިތުރު ތަހުލީލުތަކަށް މާލެ ގެނައީ އިއްޔެގެ ވަގުތެއްގައެވެ. މިމައްސަލާގައި އެއްވެސް މީހަކު މިހާތަނަށް ހައްޔަރުކޮށްފައި ނުވާއިރު، ފުލުހުންގެ ހާއްސަ ތަހުޤީގު ޓީމެއް މިހާރު ދަނީ ހޮޅުދޫގައި ހަރަކާތްތެރިވަމުންނެވެ.
މައުލޫމާތު ލިބިފައިވާ ގޮތުގައި ޒަކިއްޔާގެ ހަށިގަނޑު ފެނިފައިވަނީ ހެނދުނު އެ ގެއަށް ކުނި ނަގަން ގޭތެރެއަށް ވަން ބިދޭސީން ތަކަކަށެވެ. ގޭގެ ބަދިގެ ފަރާތުގައި ހުންނަ ގުދަނެއް ކައިރިއަށް އޭނާ ވެއްޓިފައި އޮތް އިރު ކަރުގައި ޒަޚަމްތަކެއް ހުރި ކަމަށް ބައެއް މީޑިއާތަކުން ރިޕޯޓު ކޮށްފައި ވެއެވެ.
