ބޮޑުތަކުރުފާނު މަގާ ކޮއިމަލާ ހިނގުން ގުޅޭ ކަންމަތިން މިދިޔަ ބުދަ ދުވަހުގެ ރޭ ދަންވަރު ސައިކަލަކާ ކާރެއް ޖެހި ހިނގި އެކްސިޑެންޓުގައި އަނިޔާވި ޒުވާނާ ރޭ ނިޔާވެއްޖެއެވެ.
އެ އެކްސިޑެންޓުގައި ލިބުނު އަނިޔާތަކަށް އައިޖީއެމްއެޗްގެ އައިސީޔޫގައި ފަރުވާދެމުން ދަނިކޮށް ނިޔާވެފައިވަނީ ގދ. ގައްދޫ, އުމުރުން 21 އަހަރުގެ މުހައްމަދު ލީވާންއެވެ.
ސޯޝަލް މީޑިއާގައި ދައުރުވަމުންދާ ވީޑިއޯ އިން ފެންނަ ގޮތުން އެ އެކްސިޑެންޓުގައި އެ ޒުވާނާގެ ބޯ ފަޅައިގެން ގޮސް ވަރަށް ބޮޑަށް ލޭފައިބައެވެ. އެކްސިޑެންޓުގައި ސައިކަލުގެ އިތުރުން ކާރަށްވެސް ބޮޑެތި ގެއްލުންތަކެއް ވަނީ ލިބިފައެވެ.
ވަރަށް ކައިރި ކައިރީގައި ގިނަ އެކްސިޑެންތަކެއް ހިނގަމުންދާއިރު، ރޭ ހުޅުމާލޭން ހައިވޭއަށް އަރަން އޮންނަ މަގުގައި ހުންނަ ވިލާގެ ޕެޓްރޯލް ޝެޑު ކައިރީ 2 ސައިކަލެއް ޖެހި ނުރައްކާތެރި އެކްސިޑެންޓެއް ހިނގާފައިވާއިރު އެ އެކްސިޑެންޓުގައި އަންހެނަކާއި ފިރިހެނަކަށް އަނިޔާވެފައިވެއެވެ.
