ދެ ކިޑްނީ ފެއިލްވެފައިވާ މުހައްމަދު ޔާމީން (ޔާންބެ)ގެ ފަރުވާއަށް ދެ ގަޑިއިރު ތެރޭގައި އާންމުންގެ އެހީގެ ގޮތުގައި 200,000އަށްވުރެ ގިނަ ރުފިޔާ ލިބިއްޖެއެވެ.
ޓިކްޓޮކްގައި މަޝްހޫރު ”ސްޓޭންގްމަސް“ ނުވަތަ އާންމު ނަމުންނަމަ ”ސުއާދު ޢަބްދުއްރަޙީމް(ޒިޕޯ)“ ގެ ލައިވްއިން ޔާންބެއަށް އެހީވުމަށް ފަންޑްރައިޒިން އިވެންޓެއް ބާއްވާފައިވަނީ މިރޭ 21:00 ހާއިރުއެވެ. 23:10ގައި އިވެންޓު ނިންމާލިއިރު 3700 އަށްވުރެ ގިނަ މީހުން ވަނީ ލައިވް ބަލާފައެވެ.
އެ ލައިވްގައި ރާއްޖޭގެ ޓިކްޓޮކް ކޮމިއުނިޓީގައި އެންމެ މަގްބޫލުކަން ހޯދާފައިވާ ފަރާތްތައް ވަނީ ހަރަކާތްތެރިވެފައެވެ. އޭގެ ތެރޭގައި ޑީޖޭ ހަމްބެ, ވާވާ, ހުޝާންޓޭ, މުންކޮ, ޝިފާ, ފަޔާ, ތަކޭ, އެމްޓީޕީ އަދި އަރަޓްސް ހިމެނެއެވެ.
އެ ލައިވްގެ އެހީގައި ދެގަޑިއިރު ތެރޭގައި ޔާންބެއަށް ވަނީ ޖުމްލަ 210,304 ރުފިޔާ ލިބިފައެވެ. އަދި 1382 ޑޮލަރު ވަނީ ލިބިފައެވެ. މިއީ ރާއްޖޭގައި ޓިކްޓޮކް ލައިވް ފަންޑްރައިޒް އަކުން މިހާ ބޮޑު އަދަދެއް ލިބުނު ފުރަތަމަ ފަހަރެވެ.
ޔާންބެ ބުނީ ކިޑްނީ ބަލީގެ އެންމެ ފަހު ސްޓޭޖުގައި އޭނާ ހުރިކަން އެނގުނީ މީގެ މަހެއްހާ ދުވަސްކުރިން ކަމަށެވެ. އަދި މީގެ ކުރިން މި ބަލީގެ އެއްވެސް އަލާމާތެއް ފާހަގަކުރެވިފައި ނުވާ ކަމަށާއި، މައްސަލައެއް އުޅޭކަން އެނގުނީ ކުޑަކޮށް އުނދަގޫތަކެއް ވާތީ ހެދި ލޭގެ ޓެސްޓަކުން ކަމަށް ޔާންބެ ބުންޏެވެ.
ދެ ކިޑްނީ ވެސް ފެއިލްވެފައި ވުމުން ވަގުތުން ފަރުވާ ފެށި ކަން ފާހަގަކުރަމުން ޔާންބެ ބުނީ ޑޮކްޓަރުންގެ އިރުޝާދާ އެކު މިވަގުތު ފޯކަސް ހުުރީ ކިޑްނީ ޓްރާންސްޕްލާންޓް ހެދުމަށް ކަމަށެވެ.
އެއީ ވަރަށް ހަރަދު ބޮޑު ފަރުވާއެއް ކަމުން އާންމުންގެ އެހީތެރިކަމަށް އެދޭ ކަމަށް ޔާންބެ ބުންޏެވެ.
ޔާންބެއަށް އެހީވުމަށް:
- 7770000138064 ރުފިޔާ އެކައުންޓް
- 7730000569416 ޑޮލަރު އެކައުންޓް
ޔާމްބެ ވަނީ ޖެހިޖެހިގެން ހަތަރު ފަހަރަށް މިސްޓަ މޯލްޑިވްސްގެ އެވޯޑު ހޯދައިފައެވެ. އެއީ 2017, 2021, 2022 އަދި 2023 ވަނަ އަހަރުއެވެ. 
ޔާމްބެއަކީ ބޮޑީބިލްޑިންގައި ބައިނަލްއަގުވާމީ ކާމިޔާބީތަކެއް ވެސް ހޯދާފައިވާ ބޮޑީބިލްޑަރެކެވެ. އެގޮތުން އޭނާ ވަނީ މިދިޔަ އަހަރު ބޭއްވި ވޯލްޑް ބޮޑީބިލްޑިން ޗެމްޕިއަންޝިޕުގައި ސުޕަ 90 ކިލޯގެ ކެޓަގަރީން ލޯ މެޑަލްއެއް ހޯދައިފައެވެ.
