މިއަހަރު އޮލިމްޕަހުގައި އެޅުވި އެންމެ ކާމިޔާބު ފިލްމު “ކަމަނާ”ގެ ޑިމާންޑް ބޮޑުވެ، ޝޯތައް އިތުރު ކުރަމުން ގޮސް، ދުވާލުގެ ޝޯއެއްވެސް އިއުލާން ކޮށްފިއެވެ.
ގިނަ ފާރަތްތަކެއް އެދެމުންދާތީ ސެޓާން ސްޓޫޑިއޯ އިން ވަނީ ފިލްމު ނުބެލި ހުރި ފަރާތްތަކަށް އެ ފުރުސަތު މަގުފަހި ކޮށްދިނުމުގެ ގޮތުން މީގެ ކުރިންވެސް ޝޯތަކެއް އިތުރު ކޮށްފައެވެ.
“އެކި”އަށް މަޢުލޫމާތުދެމުން ފިލްމްގެ ޕްރޮޑިއުސަރ ޝާނިޒް އަލީ ވިދާޅުވީ ގިނަ ބައެއްގެ އެދުމުގެ މަތިން ޝޯތައް އިތުރު ކުރަމުން ގޮސް 10 އަދި 11 ސެޕްޓެމްބަރުގައި 23:30 ގައި ޝޯއެއް އަޅުވަން ނިންމާފައިވާ ކަމަށާއި 13 ސެޕްޓެމްބަރުގައި ހަވީރު 15:30ގައި ވެސް އިތުރު ޝޯއެއް އަޅުވަން ނިންމާފައިވާ ކަމަށެވެ. މި ޝޯތަކުގެ ޓިކެޓް މިއަދު މެންދުރު ފަހު 2 ޖަހާއިރުން ފެށިގެން އޮލިމްޕަސް ކައުންޓަރުން ލިބެން ހުންނާނެއެވެ.
މީގެ ކުރިން އޮލިމްޕަހުގައި ދުވާލުގެ ވަގުތުތަކުގައި އަޅުވަނީ ކުޑަކުދިންގެ ފިލްމެވެ. އެހެންކަމުން މިއީ 18 އަހަރުން މަތީގެ މީހުންނަށް ޚާއްސަ ފިލްމެއް ދުވާލުގެ ވަގުތުގައި އެޅުވޭ ފުރަތަމަ ފަހަރެވެ.
ދިވެހި ފިލްމް ކަމަނާ އަށް އޮލިމްޕަސް ލިބިފައި އޮތީ މިދިޔަ މަހުގެ 27 ވަނަ ދުވަހުން މި މަހުގެ 14 ވަނަ ދުވަހާއި ހަމައަށެވެ. ފިލްމްގެ ޑިމާންޑް ބޮޑުވުމުގެ ސަބަބުން މި ދުވަސްތަކުގެ ތެރެއަށް ވަނީ ދަންވަރު ޝޯ ތަކެއް ވެސް އިތުރު ކޮށްފައެވެ. މި ހުރިހާ ޝޯތަކެއްގެ ޓިކެޓް ވިކި ހުސްވެފައިވާކަމަށް ސެޓާން ސްޓޫޑިއޯއިން މައުލޫމާތު ދެއެވެ.
