ބާރު ސްޕީޑުގައި ވެހިކަލް ދުއްވާ ފަރާތްތަކާ މެދު ހަރުކަށި ފިޔަވަޅުތައް އެޅުމަށް ގާނޫނުތަކާއި ގަވާއިދުތަކަށް ގެންނަން ޖެހޭ ބަދަލުތައް ގެނެސް، އެ ކަންކަން ތަންފީޒު ކުރަން ފަށަން ސަރުކާރުގެ ކަމާ ގުޅުންހުރި އިދާރާތަކަށް ރައީސް ޑރ. މުޙައްމަދު މުޢިއްޒު އަންގަވައިފިއެވެ.
ރޭ ހުޅުމާލޭގައި ހިނގި ނުރައްކާތެރި އެކްސިޑެންޓުގައި ރޭސް ކާރަކުން ޖެހި ނިޔާވި ޒުވާނާގެ އާއިލާއަށް ތައުޒިޔާ ވިދާޅުވެ، ”އެކްސް“ ގައި މިއަދު މެންދުރުފަހު ކުރެއްވި ޕޯސްޓެއްގައި ރައީސް ވިދާޅުވީ މިފަދަ ހިތާމަވެރި ހާދިސާތައް ހިނގުން ހުއްޓުވުމަކީ ހުރިހާ ފަރާތްތަކެއްގެ ވެސް އެއްބާރުލުން ބޭނުންވާ ކަމެއް ކަމަށެވެ.
ނުރައްކާތެރިކޮށް ބާރު ސްޕީޑުގައި ދުއްވާ ދުއްވުންތައް ހުއްޓުވައި، މާލެ އާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެންނަށް ވެސް އަމާންކަމާ އެކު ބޭނުން ކުރެވޭނެ ތަންތަން ކަމުގައި ހެދުމަށް ޓަކައި ސަރުކާރުން ކުރަން ޖެހޭ އެންމެހާ ކަންކަން މި ސަރުކާރުން ކުރާނެކަމުގެ ޔަގީންކަން ރައީސް ވަނީ ރައްޔިތުންނަށް އަރުވާފައެވެ.
ނުރައްކާތެރިކޮށް ދުއްވުމުގެ ސަބަބުން ހިނގީ ވަރަށް ހިތާމަވެރި ހާދިސާއެއް ކަމަށާއި އަނެއްކާވެސް މީހެއްގެ ފުރާނަ މި ވަނީ ގެއްލިފައިކަން ރައީސް ފާހަގަކުރެއްވިއެވެ.
ނުރައްކާތެރިކޮށް ދުއްވުމުގެ ސަބަބުން ވި އެކްސިޑެންޓެއްގައި ރޭ މެންދަމުވަނީ ވަރަށް ހިތާމަވެރި ޙާދިސާއެއް ހިނގާ އަނެއްކާވެސް މީހެއްގެ ފުރާނަ ގެއްލިފައި. ރޭގައި ހިތާމަވެރި ގޮތެއްގައި މި ދުނިޔެ ދޫކުރި 23 އަހަރުގެ ޒުވާން ޙަސަން ސަމާޙުގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު…
— Dr Mohamed Muizzu (@MMuizzu) September 6, 2024
ރޭ މެންދަމު 2:30 ހާއިރު، ސެންޓްރަލް ޕާކު ކައިރިން ހިނގި މި އެކްސިޑެންޓުގައި ނިޔާވީ ލ. އިސްދޫއަށް ނިސްބަތްވާ އުމުރުން 23 އަހަރުގެ ހަސަން ސަމާހެވެ.
އެކްސިޑެންޓް ހިނގާފައި ވަނީ އިތުރު މީހަކު ގޮވައިގެން ސަމާހު ސައިކަލެއްގައި ދުއްވާފައި ދަނިކޮށް ބާރު ސްޕީޑުގައި ދުއްވާފައި އައި ރޭސް ކާރެއްގައި ޖެހިއެވެ. އެކްސިޑެންޓުގައި ސަމާހަށް ސީރިއަސް އަނިޔާތަކެއް ލިބުނެވެ. އެގޮތުން އޭނާގެ ބޮލަށާއި މޫނަށް އަނިޔާވިއިރު، ގިނަ އަދަދަކަށް ލޭ ވެސް ހަށިގަނޑުން ބޭރުވެފައިވާ ކަމަށް މައުލޫމާތު ލިބެއެވެ. ނިޔާވީ އޭނާއަށް ލިބުނު އަނިޔާތަކަކަށް ހުޅުމާލެ ހޮސްޕިޓަލުގައި ފަރުވާދޭން ފެށިތާ މާ ގިނައިރުތަކެއް ނުވަނީހެވެ.
އެކްސިޑެންޓާ ގުޅިގެން ރޭސް ކާރު ދުއްވި މީހާ ހައްޔަރުކޮށް، އޭނާގެ ވަނަވަރު ފުލުުހުން ވަނީ ހާމަކޮށްފައެވެ. އެ ކާރު ދުއްވަން އިނީ އައްޑޫ ސިޓީ ހިތަދޫ، ވައިލެޓްފެހި، އުމުރުން 26 އަހަރުގެ މުހައްމަދު ވިސާމު ސިއްދީގެވެ. އޭނާ މިވަގުތު ހުރީ ފުލުހުންގެ ހައްޔަރުގައެވެ.
ތިޔަ ކާރު ތަކަށް ފިޔަވަޅެއް ނޭޅޭނެއެވެ. ވީމާ، ހުޅުމާލޭގައި އުޅޭ އެހެން މީހުނަށް ރޭގަޑު ވަކި ގަޑިއެއްގެ ފަހުން ގެއިން ނުނިކުމެ ތިބެން އިއުލާނު ކުރާށެވެ.