ރޭ ދަންވަރު ހިނގި އެކްސިޑެންޓުގައި މެރެތަންގައި ބައިވެރިވުމަށް މާލެ އައި ހަސަން ސަމާހު ނިޔާވުމުންވެސް މެރެތަން ކުރިޔަށް ގެންދިޔުމުން އާންމުންގެ ފާޑުކިޔުން އަމާޒުވެއްޖެއެވެ.
ފުލުހުން ބުނި ގޮތުގައި އެ އެކްސިޑެންޓުގެ ރިޕޯޓް ފުލުހުންނަށް ލިބުނީ ދަންވަރު 2:48 ހާއިރުއެވެ. އެކްސިޑެންޓުގައި ބޮލަށް ލިބުނު ސީރިއަސް އަނިޔާތަކާ އެކު، އޭނާ ނިޔާވީ ހުޅުމާލެ ހޮސްޕިޓަލަށް ގެންދިޔަތާ ކުޑައިރުކޮޅެއްގެ ތެރޭގައެވެ.
މައުލޫމާތު ލިބޭ ގޮތުން އެ ޒުވާނާ މާލެ އައީ 3000-ޓީއެފްޖީގެ މެރެތަންއެއްގައި ބައިވެރިވުމަށެވެ. ޓީއެފްޖީން މީސްމީޑިއާގައި އާންމުކޮށްފައިވާ މެސެޖުގައި ބުނެފައިވަނީ ސަމާހު ނިޔާވި ހިތާމަވެރި ޚަބަރު އަޑުއެހީ ފުން ހިތާމައާއެކު ކަމަށެވެ. އޭނާއަކީ ހިތްވަރުގަދަ ދުވުންތެރިއެއް ކަމަށާއި އޭނާގެ ނިޔާވުމުގެ އެކަމުގެ ހިތާމައިގައި ބައިވެރިވާ ކަމަށެވެ.
”ހިތާމައިގެ މި ދަނޑިވަޅުގައި، އޭނާގެ ޢާއިލާއަށާއި، ރައްޔިތުންނަށް ވަރަށް ތަޢުޒިޔާ ދަންނަވަން. ދިރިއުޅުމުގެ ނާޒުކުކަމާއި ހިތާމަވެރި ވަގުތުތަކުގައި އެކަކު އަނެކަކަށް އެހީތެރިވުމުގެ މުހިންމުކަން ހަނދާންކޮށްދޭ“ އެ މެސެޖްގައި ބުނެފައިވެއެވެ.
ޓީއެފްޖީން މި މެސެޖް އާންމުކުރި ނަމަވެސް މަޢުލޫމާތު ލިބިފައިވާ ގޮތުގައި މިއަދު ހެނދުނު އެ މެރެތަން ވަނީ ކުރިޔަށްގެންގޮސްފައެވެ. މިކަމާއި ގުޅިގެން އާންމުން މީސް މީޑިއާގައި ނުރުހުންފާޅުކުރަމުންދާއިރު އާންމުން ކޮށްފައިވާ ބައެއް ކޮމެންޓުތައް ހިއްސާކޮށްލާނަމެވެ.
މީސް މީޑިއާގައި މީހަކު ކޮށްފައިވާ ކޮމެންޓެއްގައި ބުނެފައިވަނީ ”މެރަތަންއަށް އައި ޒުވާނަކު މަރު، މެރަތަން ފޯރީގައި ކުރިއަށް. އިހްތިރާމުކުރުން މި މުުޖުތަމައުން މުޅިން ގެއްލުނީބާ!؟“
ފުރާނައަށްވުރެ ގެއްލޭ ފައިސާ އަގުބޮޑީ ކަމަށް ވެސް އާންމުންގެ ފަރާތަކުން ކޮމެންޓްކޮށްފައިވެއެވެ.
”އަހަރެމެން ކުޑައިރު ކިތަންމެ ބޮޑު އިވެންޓެއް ރޭވިފަ އޮތަން މީހަކު މަރުވެއްޖިއްޔާ އެކަމެއް ވަގުތުން ކެންސަލްވޭ. ބަޓް މިހާރު އެއީ މެޓާއެއް ކާލުން ހާ އީޒީ ކަމެއް“ އާންމުންގެ މީހަކު ކޮމެންޓް ކުރިއެެވެ.
މޯލްޑިވްސް ކަރެކްޝަނަލް ސާވިސްގެ ޖަލު އޮފިސަރެއްގެ ވަޒީފާގައި ހުރި ސަމާހު އަކީ އަބަދުވެސް ދުވުންތަކުގައި ބައިވެރިވާ މީހެކެވެ. ސަމާހުގެ ކަށުނަމާދު އޮތީ މިރޭ މަގްރިބް ނަމާދަށް ފަހު ހުޅުމާލެ ސަހަރާގައެވެ.
