ދަތުރުގޮސް އުޅެނިކޮށް ތަސްލީމް މުހައްމަދު ގެއްލުނު މައްސަލައިގައި ޝައްކުކުރެވޭ ކަންތައްތަކެއް އެބަހުރި ކަމަށް އޭނާގެ އާއިލާއިން ބުނެފިއެވެ.

Ads by

ހުވަފެންފުށި ދެކުނުން ހިއްކާފައި އޮންނަ، ފަސްގަނޑަށް ދަތުރު ގޮސް އުޅެނިކޮށް ތަސްލީމް ގެއްލިފައިވާ ކަމަށް ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ފެށީ އޮގަސްޓު 30 ވަަނަ ދުވަހުގައެެވެ. އޭނާ އެންމެފަހުން ފެނިފައި ވަނީ އެދުވަހުގެ 10:00 އާއި 11:00 ހާއިރު ކަމަށް އޭނާއާއެކު ދަތުރުދިޔަ މީހުން މައުލޫމާތުދީފައިވާކަމަށް ފުލުހުން ބުނެއެވެ.

ތަސްލީމް ގެއްލުނު މައްސަލައިގައި ޝައްކުކުރެވޭ ކަންތައްތަކެއް ހުރުމުން، ޖިނާއީ މައްސަލައެއްގެ ގޮތުގައި ފުލުހުން ގެންދަނީ އެ މަސައްލަ ތަހުގީގު ކުރަމުންކަމަށެވެ.

”އަދަދު“ ދެއްވި ހާއްސަ އިންޓަވިއުއެއްގައި ތަސްލީމްގެ އާއިލާއިން ވަނީ ކަން ހިނގައި ދިޔަ ގޮތް ވަރަށް ތަފްސީލްކޮށް ކިޔައިދީފައެވެ. އާއިލާއިން ބުނި ގޮތުގައި ތަސްމީން ދަތުރު ދިޔައީ އޭނާގެ ރައްޓެހިން ބުނި ބުނުމަށެވެ. އެމީހުން ދިޔައީ އެ ރަށަށް ދަތުރު ދިޔަ ބަޔަކަށް ޖަނަރޭޓަރެއް ހިފައިގެން ކަމަށާއި ދިޔައިރު ދެ ދުވަހަށް ދަތުރުދާ ކަން އާއިލާއަށް އެނގި ކަމަށް ބުންޏެވެ.

ދިޔަ ފަހުން ވެސް މެސެޖްކޮށް ގުޅާ ހެދި ކަމަށާއި ގެއްލުނު ދުވަހު އޭނާ ކުރިން ކައިވެނިކޮށްގެން އުޅުނު މީހާއަށް ގުޅާފައިވާ ކަމަށް އާއިލާއިން މަޢުލޫމާތު ދިނެވެ. އެއީ 30ވަނަ ދުވަހުގެ ހެނދުނު 7:00 ހާއިރުއެވެ.

”އޭނައަށް ވައިބާ ކޯލްއެއް ކުރީ. ދަ ކޯލް ވޯޒް މިސްޑް. ދެޓް ޓައިމް އޭނަ ނިދާފަ އޮތީ“ އާއިލާއިން މަޢުލޫމާތު ދިނެވެ.

ތަސްލީމް އަކީ އެއްވެސް ނަފްސާނީ މައްސަލައެއް ހުންނަ މީހެއް ނޫނެވެ. ރިސޯޓުގައި މަސައްކަތް ކުރުމަށްފަހު ސަރުކާރުގެ ވަޒީފާއެއް ހޯދައިގެން މާލެ ބަދަލުވެ ދިރިއުޅެމުން ދިޔައީ ވެސް އަމިއްލަ ފްލެޓެއްގައި ކަމަށް އާއިލާއިން މައުލޫމާތު ދިނެވެ. 7 އަހަރު ކުރިން މަސްތުވާތަކެތީގެ ވަބާގައި ޖެހުނު ނަމަވެސް މިހާރު ތަސްލީމް އަކީ މަސްތުވާތަކެތި ބޭނުންކުރާ މީހެއް ނޫނެވެ. އާއިލާއިން ބުނާ ގޮތުގައި ގެނބިގެން ތަސްލީމް މަރުވާނެ ކަމަށް ނުބެލެވެއެވެ.

”އޭނަ ނުގެނބޭނެ, 100 ޕަސެންޓް ނުގެނބޭނެ. އޭނަ ގެނބެންވީ ސަަބަބެއް ނެތް. އޭނާ އަކީ ޑީޕް ސީގަ ސްވިމް ކުރާ މީހެއް. އެތަނަކީ ހަމަ ވަރަށް ބޮޑު ފަޅެއް އޮންނަ ތަނެއް. ގެނބުނަސް ފެންނާނެ. 4 ގަޑިއިރު ތެރޭގަ ފެންނާނެ. އަނެއްކާ ދެން އަޑިއަށް ދާނީ“ އާއިލާއިން ބުންޏެވެ.

ގެއްލުނު ދުވަހުގެ ހެނދުނު 8 އާއި 9 އަކާ ދޭތެރޭގެ ވަގުތެއްގައި ތަސްލީމްގެ ފޯނު ދަތުރު ދިޔަ ކުއްޖެއްގެ އަތައް ދިން ކަމަށް އާއިލާއިން ބުނެއެވެ.

”ބުންޏޯ ފޯނު ހިފަހައްޓާލާށޯ. އަހަރެން މި އަންނަނީއޯ. އެތާ އިންނާނެ ވެލިގަނޑެއް. ހިނގާފަ ވެލިގަނޑުން ފުރަގަހަށް ދިޔަ މީހާ ދެން ނުފެނޭ. އެއީ އަހަރުންނަށް ކިޔާދިން ގޮތް. އޭނަ ފޯނާ ނުލާ ނޫޅޭނެ. ވަރަށް ފޮޓޯ ނަގާނެ. ހަބަރު ކިޔާނެ. މީހުންނަށް އެއްޗެހި ފޮނުވާނެ. ސޯ ފޯނާ އޭނަ ދުރަަކަށް ނުދާނެ“ އާއިލާއިން ބުންޏެވެ.

ގެއްލުނު ދުވަހުގެ ހެނދުނު 10:30 ހާއިރު އުޅެނިކޮށް ދަތުރުގެ ބައިވެރިއެއް ގުޅާފައި ”މާމަ މަރުވެގެން ތޯ އުޅެނީ އެހި“ ކަމަށް އާއިލާއިން ބުންޏެވެ. ”ދެން ބުނީ މިއުޅެނީ އޭނަ ނުފެނިގެންނޭ އުޅެނީ“.

އެހިސާބުން ތަސްލީމް ފެނޭތޯ މަސައްކަތް ފެށި ކަމަށާއި އެހެން ލޯންޗަކަށް އެރިތޯވެސް ބަލާފައިވާ ކަމަށެވެ.

”އޭނަ އެތަނުން އަވަހަށް ދާން ބޭނުން ވީމަ އެ ބުނީ މާމަ މަރުވެއްޖެއޭ. މާމަ މަރެއް ނުވޭ“ އާއިލާއިން ބުންޏެވެ.

އާއިލާއިން ބުނާ ގޮތުގައި އެއްވެސް ކަމެއް ނުވެ މީހަކު ނުގެއްލޭނެ ކަމަށާއި އެ ދަތުރު ދިޔަ މީހުންނަށް ތަސްލީމް ވީތަން އިނގޭނެ ކަމަށެވެ. ”ކަމެއް ކުރާކަށް ނޫން ކުރީކީ, ކަމެއް ވެފަ އެ އޮތީ. ފޮރުވުމުގެ ބަދަލުގަ އޭތި ގެނައުން ރަނގަޅީ. ކަމެއް ވެދާނެ ކޮންމެ އިންސާނެއްގެ އަތުން ވެސް. ބަޓް ޑޯންޓް ހައިޑް އިޓް“ އާއިލާއިން ބުންޏެވެ.

ތަސްލީމް ހޯދުމަށް އެމްއެންޑީއެފުން ވެސް ދަނީ މަސައްކަތް ކުރަމުންނެވެ. ފިނޮޅުގެ ވަށައިގެން 5000 އަކަ ފޫޓުގެ ސަރަހައްދެއް ސްނޯކަލް ކޮށްގެންނާއި، އަދި 3000 އަކަފޫޓުގެ ސަރަހައްދެއް ކަނޑުއަޑިން ޑައިވްކޮށްގެން ކޯސްޓްގާޑުގެ ޑައިވަރުން ބަލާފައިވާ ކަމަށް އެމްއެންޑީއެފުން މަޢުލޫމާތުދެއެވެ. އެހެންނަމަވެސް މިހާތަނަށް ލިބިފައިވާ މައުލޫތަށް ބަލާއިރު، ތަސްލީމް ގެއްލިފައިވަނީ މޫދަށްކަން ކަށަވަރު ކުރެވިފައި ނުވާތީ، އޭނާ ހޯދުމުގެ އޮޕަރޭޝަން ލީޑު ކުރަނީ ދިވެހި ފުލުހުންގެ ޚިދުމަތުންކަމަށްވެސް އެމްއެންޑީއެފުން ބުނެފައިވެއެވެ.