ކުއްލި މަރު ގިނަވެއްޖެއެވެ. އެކިއެކި ބަލީގައި ނިިޔާވާ މީހުން ގިނަވެއްޖެއެވެ. ދުނިޔެވީ ބަލިމަޑުކަން އިތުރުވެ އެކަމުގައި ވެސް މަރުވާ މީހުން ގިނަވެއްޖެއެވެ. އަހަރެމެން މިއިން އިބްރަތް ހާސިލްކުރާކަށް ނުވޭތޯއެވެ.
ކޮންމެ ވަގުތަކު ވެސް ކޮންމެ ތަނަކު ވެސް އަދި ކޮންމެ ކަމެއްގައި ހުރި ނަމަވެސް ޙަޔާތް ނިމިދާނެއެވެ. އަހަރަމެން ދުނިޔެވީ ހަޔާތުގެ އެކި ކަންކަމުގައި ޝާމިލުވެއުޅޭއިރު އަހަރަމެންނާ ނުހަނުގާތުގައި އެކުގައި އުޅޭ ގާތް ރަޙްމަތްތެރިއަކު، އެއްބަނޑުއެއްބަފާ މީހަކު, މަންމަޔަކު ނުވަތަ ބައްޕަޔަކު މިދުނިޔެއާއި އަލްވަދާޢު ކިޔުމަށްފަހު އަހަރުމެންނާއި ވަކިވެގެން ދާ މަންޒަރު އެބަފެނެއެވެ. މި ދައްކަނީ ހިނދުކޮޅެއްކުރީން އަހަރެމެންނާއި ކައިރިން ހީ ސަމާސާކޮށް އުޅުނު މީހުންގެ ވާހަކައެވެ.
ގާތްމީހަކު އަހަރުމެންނާއި ވަކިވެގެން ދިޔުމުން އަހަރެމެންނަށް ހިތާމަ ކުރެވެއެވެ. ޤަބުރުސްތާނުގައި ރޮއެ ހެދެއެވެ. އޭގެ ފަހުން ވެސް ދުވަސްކޮޅަކަށް އެ ހަނދާންތައް އާވެއެވެ. ނަމަވެސް މާގިނަ ދުވަހެއް ނުވެ އެ ހިތާމަތައް ހިތްތަކުން ފިލައި އެކަމުގެ އިޙްސާސް ކެނޑެއެވެ. ހަމަ އެދުވަސް އަހަރެމެންނާވެސް ކުރިމަތިލާނެކަން ހަނދާނަކު ނުހުރެއެވެ.
ހަމަ ޔަގީނުންވެސް މަރަކީ ވަރަށް އިންސާފުވެރި އެއްޗެކެވެ. ކޮންމެ މީހަކު ވެސް މަރުގެ ރަހަ ދެކޭނެއެވެ. މުއްސަންޖެއް, ފަޤީރެއް, އަންހެނެއް, ފިރިހެނެއް, ކުޑަކުއްޖެއް, ބޮޑު މީހެއް ބެލުމެއް ނެތެވެ. ހަމަ ކުޑަހިނދު ކޮޅެއްގެތެރޭގައި އަހަރަމެންގެ ހުރިހާ ކަމެއްނިމި ތާއަބަދައްޓަކައި މިދުނިޔެއާ ވަކިވާން ޖެހިދާނެއެވެ.
މި ދުނިޔޭގައި މަރުގެ ރަހަ ނުދެކޭނޭ އެއްވެސް ނަފުސެއް ނުވެއެވެ. ކޮންމެ މަރަކީ ވެސް ދިރިތިބީންނަށް ކޮށްދެވޭ ހަނދާން ކޮށްދިނުމެކެވެ. ލަސްނުކޮށް މަރަށް ތައްޔާރުވާށެވެ!
