ރޭސް ކާރަކުން ޖެހި ރޭ ހިނގި އެކްސިޑެންޓުގައި ނިޔާވި ހަސަން ސަމާހުގެ ކަށު ނަމާދު މިރޭ މަގްރިބް ނަމާދަށްފަހު ކުރުމަށް ހަމަޖައްސައިފިއެވެ.
މި އެކްސިޑެންޓްގައި ނިޔާވީ ލ. އިސްދޫއަށް އުފަން އުމުރުން 23 އަހަރުގެ ހަސަން ސަމާހުއެވެ.
މި އެކްސިޑެންޓް ހިނގީ ހުޅުމާލެ ސެންޓްރަލް ޕާކް ކައިރިން ބާރު ސްޕީޑްގައި ދުއްވާފައި ދިޔަ ސްޕޯޓްސް ކާރެއް ހަސަން ސަމާހް ދުއްވަމުން ދިޔަ ސައިކަލްގެ ޖެހިގެންނެވެ.
ފުލުހުން ވިދާޅުވީ އެކްސިޑެންޓް ހިނގި ކަމުގެ ރިޕޯޓް ފުލުހުންނަށް ކޮށްފައިވަނީ ރޭ ދަންވަރު 2:48ހާއިރު ކަމަށެވެ. ސަމާހް ނިޔާވީ އެކްސިޑެންޓާ ގުޅިގެން ފަރުވާ ދިނުމަށް ހުޅުމާލެ ހޮސްޕިޓަލަށް ގެންދިޔަތާ އިރުކޮޅެއް ފަހުންނެވެ.
އެކްސިޑެންޓާ ގުޅިގެން ފުލުހުން ވަނީ ކާރު ދުއްވި 26 އަހަރުގެ ދިވެހި ފިރިހެނަކު ހައްޔަރުކޮށްފައެވެ.
