ގައުމީ އެތުލެޓިކްސް މުބާރާތުގެ 100 މީޓަރުގެ ރޭސް ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދު ބަލިކޮށް، އިބާދުﷲ އާދަމް ކާމިޔާބުކޮށްފިއެވެ.
މިއީ، 2013 ވަނަ އަހަރުގެ ފަހުން ގައުމީ މުބާރާތުގެ 100 މީޓަރުގެ ރޭސް ސާއިދު ނޫން ދުވުންތެރިއަކު އެއްވަނަ ހޯދި ފުރަތަމަ ފަހަރެވެ.
މިގޮތުން، ސާއިދުގެ މައްޗަށް 100 މީޓަރު ރޭހުގެ ފައިނަލުގައި، ރައުހަތު ސްޕޯޓްސްގެ އިބާދުﷲ ކުރިހޯދީ، 10.59 ސިކުންތުން ރޭސް ނިންމައިގެންނެވެ. ދެ ވަނަ އަށް ދިޔަ ސާއިދު ރޭސް ނިންމީ، 10.67 ސިކުންތުންނެވެ. ތިން ވަނަ ހޯދި، ޓްރެކް އެންޑް ފީލްޑް އެސޯސިއޭޝަންގެ މުހައްމަދު މިންހާލް ޝާމިން ރޭސް ނިންމީ، 10.74 ސިކުންތުންނެވެ.
ޖެމެއިކާގައި ޓްރެއިނިން ހަދަމުން އައި، އިބާދުﷲ އަކީ ފްރާންސްގެ ޕެރިހުގައި ނިމުނު އޮލިމްޕިކްސްގައިވެސް ރާއްޖެ ތަމްސީލް ކުރި އެތްލީޓެވެ. މިދިޔަ އަހަރުގެ ގައުމީ މުބާރާތުގައި އިބާދުﷲ ނުދުވެއެވެ.
އަންހެނުންގެ 100 މީޓަރުގެ ރޭސް މި ފަހަރު ވެސް ކާމިޔާބުކުރީ އަހުނާ ނިޒާރުއެވެ. އޭނާ ރޭސް ނިންމީ، 12.33 ސިކުންތުންނެވެ. ދެ ވަނަ އަށް ދިޔަ އައިޝަތު ޝަބާ ސަލީމް ރޭސް ނިންމީ 12.40 ސިކުންތެެވެ.
އިއްޔަ 100 މީޓަރު ދުވުމުގެ ރޭސް އިބާދުﷲ ކާމިޔާބު ކުރިނަމަވެސް، ގައުމީ ރެކޯޑް އަދިވެސް އޮތީ ސާއިދު އަތުގައެވެ. އެއީ 2016 ވަނަ އަހަރު 10.33 ސިކުންތުން ދުވެގެންނެވެ.
