ޔުއެފާ ނެޝަނަލް ލީގުގައި ރޭ އަމިއްލަ ދަނޑުގައި ކްރޮއޭޝިއާއި އަތުން 2-1 ގެ ނަތީޖާއަކުން ޕޯޗުގަލް މޮޅުވި މެޗުގައި އެޓީމުގެ ކެޕްޓަން ކްރިސްޓިއާނޯ ރޮނާލްޑޯ ކާމިޔާބުކުރި ލަނޑާއެކު ކެރިއަރުގައި 900 ލަނޑު ކާމިޔާބުކޮށްފިއެވެ.
އުމުރުން 39 އަހަރުގެ ރޮނާލްޑޯ އަކީ މި އަދަދަށް ލަނޑު ހަމަކުރި ފުރަތަމަ ކުޅުންތެރިޔާއެވެ. އޭނާއާ އެންމެ ކައިރިން ވާދަކުރާ އާޖެންޓީނާގެ ލިއޮނަލް މެސީ ޖަހާފައިވަނީ 838 ލަނޑެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ، މިމެޗުގައި ފުރަތަމަ ލަނޑުޖަހައި ކުރިހޯދީ ޕޯޗުގަލް އިންނެވެ. މިލަނޑު ފުރަތަމަ ހާފު ފެށިފެން ހަތް ވަނަ މިނެޓުގައި ކާމިޔާބުކޮށްދިނީ ޑިފެންޑަރު ޑިއޭގޯ ޑަލަޓްއެވެ. ޕޯޗުގަލް އިން ލީޑު ފުޅާކުރި ލަނޑު ފުރަތަމަ ހާފުގެ 34 ވަނަ މިނެޓުގައި ކާމިޔާބުކޮށްދިނީ އެޓީމުގެ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ ޕޯޗުގަލް ގައުމީ ޓީމަށް އޭނާ ކާމިޔާބުކޮށްދިން 131 ވަނަ ލަނޑެވެ.
ކްރޮއޭޝިއާ އިން ނަތީޖާގެ ފަރަގު ކުޑަކުރި ލަނޑަކީ ފުރަތަމަ ހާފުގެ 41 ވަނަ މިނެޓުގައި ޕޯޗިގަލްގެ ޑިފެންޑަރު ޑަލަޓް އަތުން ބައިކޮޅަށް ވަން ލަނޑެކެވެ. އަދި މީގެ އިތުރުން ވެސް މިމެޗުގައި ދެޓީމުން ވެސް ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.
