ފުވައްމުލަކު ބަނދަރު ސަރަހައްދުން ފަތުރުވެރިކަމުގެ ބޭނުމަށް ބިން ކުއްޔަށް ދޫކުރަން ހުޅުވާލައިފިއެވެ.
ފުވައްމުލަކު ސިޓީ ކައުންސިލުން އިއްޔެ ސަރުކާރު ގެޒެޓްގައި ކޮށްފައިވާ އިއުލާނުގައި ބުނެފައިވަނީ ބިން ކުއްޔަށް ދޫކުރަން ނިންމާފައިވާތީ ޝަރުތު ހަމަވާ ފަރާތްތަކަށް އެކަމަށް އެދި ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ. އަދި އެ ފަރާތްތަކަށް ބިން ކުއްޔަށް ދޫކުރުމަށް ނިންމާފައިވަނީ ބިޑު ޑޮކިއުމެންޓް ވިއްކައިގެން ކަމަށާއި ބިޑް ޑޮކިއުމެންޓް ގެ އަގަކީ 100.00 ޑޮލަރެވެ.
މީގެ އިތުރުން އިއުލާނުގައި ބުނެފައިވަނީ ބިޑު ހުށަހެޅޭނީ ކަނޑައެޅިފައިވާ މުއްދަތުގައި ބިޑް ޑޮކިއުމެންޓް ގަނެފައިވާ ފަރާތްތަކަށް، ކޮންމެ ފަރާތެއްގެ ނަމުގައި 1 ޕްރޮޕޯސަލްކަމަށެވެ. އަދި ބިޑު ހުށައެޅުމަށް ބޭނުންވާ ފަރާތްތަކުން މިއަދުން ފެށިގެން މިމަހުގެ 11 ވާ ދުވަހުގެ މެންދުރު 13:00 އާ ހަމައަށް ބިޑު ގަތުމުގެ ފުރުސަތު ވަނީ ހުޅުވާލަފައެވެ.
އަދި އެ ގަތުމަށް ބޭނުންވާ ފަރާތްތަކުން ކައުންސިލްގެ ޕްރޮކިއުމަންޓް ޔުނިޓްގެ މެއިލްއަށް (procurement@fuvahmulah.gov.mv) ބިޑު ގަންނަން ބޭނުންވާ ފަރާތުގެ ތަފްސީލާ އެކު މެއިލް ކުރުމަށް އެ ކައުންސިލުން އެދިފައި ވެއެވެ.
ބީލަމާއި ގުޅޭ މައުލޫމާތު ބައްދަލުވުން މާދަމާ 11:00 ގައި އޮންނައިރު، އެކަމަށް އެދި ހުށަހެޅުމާއި އެ ހުޅުވުން އޮންނާނީ މި މަހުގެ 17 ވަނަ ދުވަހުގެ 09:00 ގައެވެ.
