މިދިޔަ މަހުގެ 27 ވަނަ ދުވަހު އޮލިމްޕަހުގައި ރިލީޒްކުރި ދިވެހި ފިލްމު ‘ކަމަނާ ގެ 32 ޝޯ މި ހަފްތާ ބަނދުގައި އަޅުވާނެ ކަމަށް ސެޓާން ސްޓީޑިއޯއިން ބުނެފިއެެވެ.
ސެޓާން ސްޓޫޑިއޯއިން “އެކި” އަށް މަޢުލޫމާތު ދެމުން ބުނީ މި ހަފްތާ ބަންދުގައި ރާއްޖޭގެ އެކި ރަށްރަށުގައި ޖުމްލަ 32 ޝޯ އަޅުވަން ނިންމާފައިވާ ކަމަށާއި މާލޭގައި އެކަނި ވެސް މިހާރު 27 ޝޯ އަޅުވަން ހަމަޖެހިފައިވާކަމަށެވެ.
ސެޓާން ސްޓޫޑިއޯއިން އިތުރަށް ބުނެފައިވަނީ މިހާތަނަށް ކަމަނާގެ ޖުމަލް 73 ޝޯ އަޅުވަން ހަމަޖެހިފައިވާ ކަމަށެވެ. މާލޭގެ ޝޯތައް އެއްކޮށް ފުލްވެފައިވާއިރު ރާއްޖޭގެ ގިނަ ރަށްރަށުގައިވެސް މި ފިލްމު އެޅުވުމަށް ހަމަޖެހިފައިވެއެވެ.
މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު (ކިޑޫ) ޑައިރެކްޓް ކޮށްފައިވާ ‘ކަމަނާ’ އަކީ ރާއްޖޭގައި އާންމުވެފައިވާ އިޖުތިމާއީ ބޮޑު މައްސަލައެއް ކަމުގައިވާ ގެވެށި އަނިޔާ ކުރުމާއި ދެކޮޅަށް މުޖުތަމައު ހޭލުންތެރިކުރުމުގެ ގޮތުން ހަގީގީ ހާދިސާ އަކަށް ބިނާކޮށް އުފައްދާފައިވާ ފިލްމެކެވެ.
މި ފިލްމްގެ ލީޑް ތަރީންގެ ތެރޭގައި ހިމެނެނީ މަރްޔަމް ޢައްޒަ އާއި ޔޫސުފް ޝަފީޢުގެ އިތުރުން އާމިނަތު ރަޝްފާ (އާޝާ) އެވެ. މީގެ އިތުރުން ނަތާޝާ ޖަލީލް އާއި މުޙައްމަދު މަނިކު އާއި ދަރާ މުޙައްމަދު ރަޝީދު ފިލްމްގެ މުހިންމު ރޯލްތަކުން ފެނިގެންދާނެއެވެ. މިއީ ސެޓަރން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން އުފައްދާފައިވާ ފިލްމެކެވެ.
