މިމަހުގެ 27ވަނަ ދުވަހު އޮލިމްޕަހުގައި ރިލީޒްކުރި ދިވެހި ފިލްމު ‘ކަމަނާ’ގެ ހުރިހާ ޝޯއެއްގެ ޓިކެޓް ވިކި ހުސްވެއްޖެއެވެ.
ސެޓާން ސްޓޫޑިއޯއިން މަޢުލޫމާތުދީފައިވާ ގޮތުގައި މިދިޔަ މަހުގެ 27ވަނަ ދުވަހުން ފެށިގެން 14 ސެޕްޓެމްބަރާ ހަމައަށް ޖުމްލަ 27 ޝޯގެ ޓިކެޓް ވަނީ ވިކި ހުސްވެފައެވެ. އިތުރު ޝޯތަކެއް އެޅުވޭތޯ އަދިވެސް މަސައްކަތް ކުރަމުންދާ ކަމަށް ސެޓާން ސްޓޫޑިއޯއިން ބުންޏެވެ.
މަހުދީ އަހުމަދުގެ ސްކްރީންޕްލޭއަކަށް ހުސައިން މުނައްވަރު (ކިޑޫ) ޑައިރެކްޓް ކޮށްފައިވާ ‘ކަމަނާ’ އަކީ ގެވެށި އަނިޔާގެ ހަގީގީ ހާދިސާތަކެއްގެ މައްޗަށް ހަދާފައިވާ ފިލްމެކެވެ.
މި ފިލްމްގެ ލީޑް ތަރީންގެ ތެރޭގައި ހިމެނެނީ މަރްޔަމް ޢައްޒަ އާއި ޔޫސުފް ޝަފީޢުގެ އިތުރުން އާމިނަތު ރަޝްފާ (އާޝާ) އެވެ. މީގެ އިތުރުން ނަތާޝާ ޖަލީލް އާއި މުޙައްމަދު މަނިކު އާއި ދަރާ މުޙައްމަދު ރަޝީދު ފިލްމްގެ މުހިންމު ރޯލްތަކުން ފެނިގެންދާނެއެވެ. މިއީ ސެޓަރން ސްޓޫޑިއޯ އާއި ކިޑް ޕްރޮޑަކްޝަން ގުޅިގެން އުފައްދާފައިވާ ފިލްމެކެވެ.
ބޭވަފާތެރި ފިރިއެއްގެ ސަބަބުން މާބަނޑު މީހަކަށް ކުރިމަތިލާން ޖެހޭ ގެވެށިއަނިޔާގެ ހަގީގީ ހާދިސާތަކެއްގެ މައްޗަށް ބިނާކޮށް ހަދާފައިވާ މި ފިލްމަކީ މުޅި މުޖުތަމަޢުއަށް ދެވޭ ވަރަށް މުހިންމު މެސެޖެއް ކަމަށް ފިލްމުގެ ޕްރޮޑިއުސަރު ޝާނީޒް އަލީ ވަނީ ބުނެފައެވެ.
