މާލޭގައި މިދިޔަ ބުރާސްފަތި ދުވަހުގެ ރޭ ވަޅިން ބިރު ދައްކައި އަންހެނަކު ރަހީނުކުރި މައްސަލައިގައި ފުލުހުން ހައްޔަރުކުރި ށ. މިލަންދޫ، ހެޕީލޭންޑް އާދަމް އަތުހަރު މަރުވީ ދަންޖެހިގެން ލިބުނު އަނިޔާތަކުގައި ކަމަށް ގަބޫލު ނުކުރެވޭ ކަމަށް އާއިލާއިން ބުނެފިއެވެ.
އަތުހަރު ރަހީނުކޮށް ކަރުގައި ވަޅި ޖައްސާ ބިރުދައްކާފައިވަނީ އޭނާގެ ލޯބިވެރިޔާއަށެވެ. އަންހެން ކުއްޖާ ސަލާމަތްކުރަން ފުލުހުން ކުރި މަސައްކަތުގައި އަތްހަރުގައިގައި މުގުރުން ޖެހުމުން އޭނާއަށް ލިބުނު އަނިޔާތަކަށް ފުރަތަމަ ފަރުވާ ދިނީ އޭޑީކޭ ހޮސްޕިޓަލްގައެވެ. އޭގެ ފަހުން ހާލު ގޯސްވެ އައިޖީއެމްއެޗްގައި ފަރުވާ ދިނުމަށްފަހު ޝަރީއަތް ނިމެންދެން ބަންދުކުރަން ކޯޓުން ވަނީ އަމުރުކޮށްފައެވެ.
ފުލުހުން ބުނި ގޮތުގައި، އޭނާ ބަންދުކޮށްފައި ހުރި ގޮޅީގައި އަތުހަރު އަމިއްލައަށް މަރުވާން މަސައްކަތް ކޮށްފައިވަނީ އިއްޔެ އިރު އޮއްސި 7:02 ގައެވެ. އޭގެ ފަހުން ފަރުވާދެމުންދަނިކޮށް އޭނާ މަރުވެފައިވަނީ މިއަދު ހަވީރު 4:08 ހާއިރު ކަމަށް ފުލުހުން ބުންޏެވެ.
އަތުހަރުގެ ބޭބެ މުޙައްމަދު ތަސްމީން މިއަދު ބުނީ މީޑިއާތަކާއި ފުލުހުން އާންމުކޮށްފައިވާ މަޢުލޫމާތުތަކަށް ބަލާއިރު އަތުހަރު މަރުވީ ދަންޖެހިގެން ކަމަށް ބުނި ނަމަވެސް އެކަން ގަބޫލުނުކުރާ ކަމަށެވެ. އަދި އަޑުއިވެނީ ނާޑުވާއެއް ނުވަތަ ރަބަރުކޮޅެއް ބޭނުންކޮށްގެން ދަންޖެހުނުކަން ކަމަށާއި ނަމަވެސް ބެލި ބެލުމަށް ކަރުގައި ވެސް އެފަދަ އެއްޗަކުން ބަނދެފައިވާ ފަދަ ނިޝާނެއް ފެންނަން ނެތް ކަމަށް ތަސްމީން ބުންޏެވެ.
”މަރުވެފަ ދެން ސާފު ކުރި ފަހުން އަޅުގަނޑު ބަލާލިއިރު އަޅުގަނޑަކަށް ކަރަކުން އެއްވެސް ވަރަަކަށް ނުފެނޭ އެއްވެސް ނިޝާނެއް, ދަންޖެހިފަ ހުރިއްޔާ ހުންނާނެ އެއްވެސް ނިޝާނެއް, ރަތް އަރާފަ ނެތް. އަޅުގަނޑަކަށް އެއްވެސް ވަރަކަށް ނުފެނޭ ދަންޖެހިގެން މަރުވި ކަމުގެ ނިޝާނެއް“ ތަސްމީން ބުންޏެވެ.
ތަސްމީން ބުނީ ޕޯސްމޯޓަމް ހަދަން ވެސް އާއިލާއިން އެއްވެސް ވަރަކަށް ބޭނުން ނުވާ ކަމަށާއި ބޭނުންވަނީ ވީއެންމެ އަވަހަކަށް ވަޅުލަން ކަމަށެވެ.
އަދި ޖަލުގައި ހުރެ ދަންޖެހިގެން މަރުވިކަމަށް ބުނާއިރު ދަންޖެހެން ބޭނުން ކުރި އާލާތްތަކާއި ސީސީޓީވީ ފޫޓޭޖް އާއިލާއާ ހިއްސާ ކުރުމަށް ފުލުހުންގެ ކިބައިން އެދިފައިވާނެ ކަމަށާއި ނަމަވެސް އެކި ފަހަރު ފުލުހުން ދައްކަނީ އެކި ވާހަކަ ކަމަށް ތަސްމީން ބުންޏެވެ.
