މިއަދު ދިވެހިރާއްޖޭގައި ދެމެހެއްޓެނިވި ހަކަތައިގެ ހައްލުތަކަށް މަގުފަހިކުރުމަށްޓަކައި، އެމެރިކާގެ ބައިނަލްއަޤްވާމީ ތަރައްޤީއަށް މަސައްކަތްކުރާ އިދާރާ (ޔޫ.އެސް.އޭ.އައި.ޑީ) އާއި ދިވެހި ސަރުކާރާ ދެމެދު އެއްބަސްވުމެއްގައި ސޮއިކުރެވިއްޖެއެވެ.
މި އެއްބަސްވުމުގެ ދަށުން ފެށޭ ސައުތު އޭޝިއާ ރީޖަނަލް އެނަރޖީ ޕާޓްނަރޝިޕް(ސާރެޕް) މަޝްރޫޢުގެ ދަށުން ދިވެހިރާއްޖޭގައި ހަކަތައިގެ ދާއިރާ ކުރިއެރުވުމަށް މަސައްކަތްކުރެވޭނެއެވެ. މި އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މޫސުމީ ބަދަލުތަކާ ތިމާވެއްޓާ ހަކަތައާއި ބެހޭ ވަޒީރު ޠާރިޤް އިބްރާހީމެވެ.
މި ރަސްމިއްޔާތުގައި ވާހަކަދައްކަވަމުން އެންވާރަމެންޓް މިނިސްޓަރު ވިދާޅުވީ ހަކަތަ ރައްކާތެރިކަން އިތުރުކޮށް، ހަކަތައިގެ ކުރިއަރާފައިވާ ހައްލުތައް ހޯދުމަށް ރާއްޖެއިން ކުރާ މަސައްކަތަށް އަލިއަޅުއްވާލައްވާފައިވެއެވެ. ޔޫއެސްއެއިޑްގެ ފަރާތުން ލިބުނު އެއްބާރުލުމަށް ޝުކުރު އަދާކުރައްވައި، ކުދި ޖަޒީރާ ގައުމުތަކަށް ދިމާވެފައިވާ ހަކަތައާ ގުޅޭ ތަފާތު ގޮންޖެހުންތައް ހައްލުކުރުމުގައި މިފަދަ ޕާޓްނަޝިޕްތަކުގެ މުހިންމުކަން ފާހަގަކުރެއްވިއެވެ. އަދި ޔޫއެސްއޭއިޑްގެ ބިއުރޯ ފޯ އޭޝިއާގެ އެސިސްޓެންޓް އެޑްމިނިސްޓްރޭޓަރު މިސްޓަރ މައިކަލް ޝިފަރ ވަނީ ހަކަތަ ދެމެހެއްޓެނިވި ގޮތެއްގައި ކުރިއަށް ގެންދިއުމުގައި ސަރަހައްދީ އެއްބާރުލުމުގެ މުހިންމު ދައުރަށް އަލިއަޅުވާލައްވާފައެވެ.
މި މަޝްރޫޢަކީ ދެމެހެއްޓެނިވި ހަކަތައިގެ ހައްލުތައް ހޯދުމަށާއި ހަކަތަ ބޭނުންކުރުމުގައި ހުރި ދަތިތަކަށް ހައްލު ހޯދުމަށް އަމާޒުކޮށްގެން ކުރިއަށްގެންދާ މަޝްރޫޢެކެވެ. މީގެ އިތުރުން މި މަޝްރޫޢުގެ ދަށުން ހަކަތަ އުފެއްދުމާއި ބޭނުންކުރުމުގައި ހަރުދަނާ އުސޫލުތަކެއް ގެންގުޅުމަށް ބާރުއަޅައި، ތިމާވެއްޓާ ރައްޓެހި ގޮތްތައް ބޭނުންކުރުމަށް މަގުފަހިކުރެވޭނެއެވެ.
މި އެއްބަސްވުމުގައި ސޮއިކުރެވުމާއެކު، ދިވެހިރާއްޖޭގެ ހަކަތައިގެ ދާއިރާގައި އިތުރު ކުރިއެރުންތަކެއް ލިބި، ދެމެހެއްޓެނިވި ގޮތެއްގައި ހަކަތަ އުފެއްދުމާއި ބޭނުންކުރުމަށް މަގުފަހިވެގެންދާނެ ކަމަށް ބެލެވެއެވެ.
މި ހަރަކާތުގައި ޔުޓިލިޓީ ރެގިއުލޭޓަރީ އޮތޯރިޓީ، ސްޓެލްކޯ، ފެނަކަ ކޯޕަރޭޝަން، މޯލްޑިވްސް ކަސްޓަމްސް ސާވިސް، ހައުސިން ޑިވެލޮޕްމެންޓް ކޯޕަރޭޝަން އަދި މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީ) ހިމެނޭ ގޮތަށް އެކި މިނިސްޓްރީތަކާއި ޖަމިއްޔާތަކުގެ މަންދޫބުން ބައިވެރިވެފައިވެއެވެ.
