އެސްޓީއޯއިން މާލޭގައި 25 ބުރީގެ މަލްޓިޕާޕަސް އިމާރާތެއް އަޅައިދޭނެ ބަޔަކު ހޯދަން އިއުލާނުކޮށްފިއެވެ.
އެސްޓީއޯ އިން ކުރި އިއުލާނެއްގައި ބުނީ 25 ބުރީގެ ކޮމާޝަލް އިމާރާތެއް އަޅަނީ ކުންފުނީގެ ވިޔަފާރި ފުޅާކުރުމާއެކު، ޖާގަ އިތުރު ކުރުމުގެ ބޭނުމުގައި ކަމަށެވެ.
މި އިމާރާތް އެޅުމަށް ހަމަޖެހިފައިވަނީ މާލޭގައި ހުންނަ އެސްޓީއޯގެ ހެޑް އޮފީހާ އިންވެގެން އޮންނަ 15،000 އަކަ ފޫޓުގެ ބިމެއްގައެވެ.
ކޮންޓްރެކްޓާ ފައިނޭންސް އުސޫލުން، އެސްޓީއޯގެ 15 ޕަސެންޓް އިކުއިޓީ ހިމެނޭ ގޮތަށް ކުރިއަށްގެންދަން ނިންމާފައިވާ މި މަޝްރޫއަށް ޝައުގުވެރިކަން ފާޅުކުރެވޭނީ 18 މިލިއަން ޑޮލަރު ނުވަތަ އެއަށް ވުރެ ފާއިތުވި ފަސް އަހަރު ތެރޭ އެފަދަ ބޮޑު މަޝްރޫއުއެއް ހިންގާފައިވާ ފަރާތްތަކަށް ކަމަށް އެސްޓީއޯގެ އިއުލާނުގައި ބުނެފައިވެއެވެ.
މި މަޝްރޫއު އަށް ޝައުގުވެރިކަން ފާޅުކުރުމުގެ ފުރުސަތު މި މަހުގެ 13 ގެ ނިޔަލަށް ވަނީ ހުޅުވާލާފައެވެ.
