ވައިގެ މަގުން ރާއްޖެއަށް އެތެރެ ކުރަން އުޅުނު 15 ކިލޯގެ މަސްތުވާތަކެތި އަތުލައިގަނެވިފައިވާ ކަމަށް މޯލްޑިވްސް ކަސްޓަމްސް ސާރވިސްއިން މިއަދު ބުނެފިއެވެ.
އިސްކަންދަރު ކޮށީގައި ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން ކަސްޓަމްސްގެ ހެޑް އޮފް އިންޓެލިޖެންސް ސުޕްރިޑެންޓެންޑް މުހައްމަދު އަފްޒަލް ވިދާޅުވީ، އެ ތަކެތި އަތުއިގަނެވިފައިވަނީ ހޮނިހިރު ދުވަހު ރާއްޖެ އައި މެލޭޝިޔާ ފިރިހެނެއްގެ ލަގެޖުން ކަމަށެވެ. އޭނާ ވިދާޅުވީ، މިއީ މެލޭޝިޔާ ފަސިންޖަރެއްގެ އަތުން ރާއްޖެއިން މަސްތުވާތަކެތި އަތުލައިގަނެވުނު ފުރަތަމަ ފަހަރު ކަމަށެވެ.
އެ މައްސަލައާއި ގުޅިގެން 2 މީހަކު ހައްޔަރު ކޮށްފައިވާ ކަމަށް ވެސް އަފްޒަލް ވިދާޅުވިއެވެ. އަދި އެ މައްސަލައިގައި އިތުރު ބަޔަކަށްވެސް ތުހުމަތު ކުރެވޭ ކަމަށް ވެސް ވިދާޅުވިއެވެ. މެލޭޝިއާ މީހާގެ ލަގެޖުން 15.38 ކިލޯގެ ކެނަބިސް ވަނީ ފެނިފައެވެ. އަދި އެ ތަކެތީގެ މަގުމަތީ އަގު 12.3 މިލިއަން ދިވެހި ރުފިޔާއަށް އަރައެވެ.
އަފްޒަލް އިތުރަށް ވިދާޅުވީ، މެލޭޝިއާ މީހާ ދަތުރުކުރި މަގު ކަސްޓަމްސްއަށް އޮޅުވާލުމަށް މަސައްކަތްތަކެއް ކޮށްފައިވާ ކަމަށާއި އޭނާގެ އަތުން ފޭކް ޓިކެޓެއް ފެނިފައިވާ ކަމަށެވެ. އެގޮތުން، އެ މީހާ ރާއްޖެ އައިސްފައިވަނީ ބެންކޮކުން ދުބާއީ އިން މާލެއަށް ކަމަށް ވިދާޅުވިއެވެ. ހަމައެއާއެކު އެ މީހާ ދަތުރުކުރަން ހަމަޖެހިފައިވަނީ މާލޭގައި މަޑުކުރުމަށްފަހު އަނބުރާ މެލޭޝިއާއަށް ދާ ގޮތަށް ކަމަށްވެސް ވިދާޅުވިއެވެ.
