ވޭތުވެދިޔަ އަހަރުގެ ފުރަތަމަ 6 މަސް ދުވަހާއި މި އަހަރުގެ ފުރަތަމަ 6 މަސް ދުވަހުގެ އާމްދަނީއަށް ބަލާއިރު، ސިޓީ ކައުންސިލުގެ އާމްދަނީއަށް 30 މިލިއަން އިތުރުކުރެވިފައިވާ ކަމަށް މާލޭގެ މޭޔަރު އާދަމް އާޒިމް ރޭ ވިދާޅުވެއްޖެއެވެ.
މޭޔަރު އާޒިމް އެހެން ވިދާޅުވީ ސިޓީ ކައުންސިލުން ރައްޔިތުންނާއި ބައްދަލު ކުރުމަށް ލޮނުޒިޔާރަތް ޕާކުގައި ބޭއްވި ބައްދަލުވުމުގައެވެ.
މޭޔަރު އާޒިމް ވިދާޅުވި 30 މިލިއަން އިތުރުކުރެވިފައިވާއިރު ސިޓީ ކައުންސިލުގެ ހަރަދުން ވަނީ 20 މިލިއަން ރުފިޔާ ސަލާމަތް ކުރެވިފައިވާ ކަމަށެެވެ. އޭނާ ވިދާޅުވީ ހަރަދުތައް ސަލާމަތް ކުރެވިފައި ވަނީ ރިކަރަންޓު ހަރަދުން 11 މިލިއަން ރުފިޔާ އަދި ކެޕިޓަލް ހަރަދުން 9 މިލިއަން ރުފިޔާ ކަމަށެވެ.
އެކައުންޓްސް އެންޑް ފައިނޭންސް މަސައްކަތް ހަރުދަނާކުރެވިފައިވާކަން ފާހަގަކޮށް އާޒިމް ވިދާޅުވީ މިހާރު މަސައްކަތް ކުރަމުން ދަނީ މިއަހަރު ނިމުމުގެ ކުރިން، ސިޓީ ކައުންސިލުގެ މަސައްކަތްތަށް އޮޓަމޭޓުކުރުން ކަމަށެވެ. އޭރުން ހިދުމަތް ލަސްވުމާއި ހިދުމަތް ހޯދުމަށް މިހާރު އަރާ އޮޅުންތަކުން ސަލާމަތްވާނެ ކަމަށެވެ.
ކުރިއަށް އޮތް 5 އަހަރު ދުވަހު މާލެ ކައުންސިލުން ކުރާނެ ކަންތައްތަކުގެ ސްޓްރެޓެޖިކް އެކްޝަން ޕްލޭނެއް ވަނީ އެކުލަވާލާފައެވެ. މޭޔަރު އާޒިމް އިތުރަށް ވިދާޅުވީ ރައްޔިތުންނަށް ހިދުމަތް ކުރުމަށް މިހާރުގެ އެކްޝަން ޕްލޭން ފުޅާކުރަން ޖެހޭ ކަމަށެވެ.
