އައްޑޫ ސިޓީއާ ގުޅިފައިވާ ރަށްތަކުން ކަރަންޓުގެ ހިދުމަތް މެދުކެނޑޭތީ، އެ މައްސަލަ ހައްލުކޮށްދިނުމަށް އެދި ގޮވާލާ އެމްޑީޕީން ރައްޔިތުންގެ މަޖިލީހަށް މިއަދު ހުށަހެޅި ކުއްލި މައްސަލައަށް ބަހުސްކުރަން ފާސްކޮށްފިއެވެ.
އެމްޑީޕީގެ ޕީޖީ ލީޑަރު ހިތަދޫ ދެކުނު ދާއިރާގެ މެމްބަރު އިބްރާހީމް ނާޒިލް ހުށަހެޅުއްވި މި މައްސަަލަ ބަލައިގަތުމަށް ފާސްވީ 57 މެމްބަރުންގެ ވޯޓާ އެކުއެވެ.
އައްޑޫއަށް ކަރަންޓު ކެނޑުމުގެ މައްސަލަ ދިމާވީ މިދިޔަ ހޯމަ ދުވަހުގެ ރެއިން ފެށިގެން އައްޑޫއަށް ކަރަންޓު ކެނޑުމުގެ މައްސަލަ ދަނީ ދިމާވަމުން ނެވެ. ފެނަކަ އިން ބުނިގޮތުގައި އެ މައްސަލަ ކުރިމަތިވީ އައްޑޫއަށް ކަރަންޓުދޭ މައި ކޭބަލްއަކަށް ދިމާވި މައްސަލައަކާ ގުޅިގެން ކަމަށެވެ.
ކުއްލި މައްސަލަ ހުށަހަޅުއްވައިދެއްވަމުން ނާޒިލް ވިދާޅުވީ އައްޑޫއާ ގުޅިފައިވާ ރަށްތައް ކަމަށްވާ ހިތަދޫ، މަރަދޫ، މަރަދޫ ފޭދޫ، އަދި ފޭދޫއަކީ 30،000 އަށް ވުރެ ބޮޑު އާބާދީއެއް ދިރިއުޅެމުންދާ ސޓީއަކަށް ވާއިރު އެ ސިޓީއަށް ކަރަންޓުގެ ހިދުމަތް ދިނުމަށް ސަރުކާރުން އިހުމާލުވެފައިވާ ކަމަށެވެ.
