އާއިލީ މީހުންނާއި، ގާތް އެކުވެރީންނާއި، ވަޒީފާގެ މާހަޢުލުގައި ވެސް ދޭދޭ ފަރުދުންގެ ދެމެދުގައި ޖެހޭ މައްސަލަތައް ގިނަވެ، މުސްލިމުންގެ މެދުގައި އޮންނަން ޖެހޭ އެއްބައިވަންތަކަމުގެ ރީތި ސިފަ އަދުގެ މުޖްތަމަޢުތަކުން ނެތިގެންދާކަމީ ދެކޮޅުނުޖެހޭނެ ހަޤީޤަތެކެވެ. މިފަދަ މައްސަލަތައް ދިމާވާން މެދުވެރިވާ މައިގަނޑު ސަބަބުތަކުގެ ތެރޭގައި އެކަކު އަނެކަކަށް އިޚްތިރާމްނުކުރުމާއި، މަސައްކަތުގެ މާހަޢުލުގައި ފަރުވާކުޑަކުރުމާއި، ޢީބަބުނުމާއި ފުރައްސާރަކުރުމާއި، ދޮގުހެދުން ހިމެނެއެވެ. މިފަދަ ނުބައި ޢަމަލުތަކުގެ ސަބަބުން މުސްލިމުންގެ މެދުގައި އޮންނަންޖެހޭ އުޚްވަތްތެރިކަމުގެ ރީތީ ސިފަ ނެތިގެންގޮސް މުޖްތަމަޢުގައި ފިތުނަފަސާދަ އުފެދުމަށް މަގުފައިވެއެވެ.
އެއްބައިވަންތަ މުޖްތަމަޢެއް ބިނާކުރުމަށްޓަކައި ސަމާލުކަންދޭންވީ އެންމެ މުހިންމު އެއްކަމަކީ ރިވެތި ބަހުން މުޢާމަލާތް ކުރުމަށް އާދަކުރުމެވެ. އެގޮތުން، ވާހަކަ ދެއްކުމުގައި އެބަޔަކަށް އެކަށޭނެ ބަސްމަގެއް އިޚްތިޔާރުކުރުން މުހިންމެވެ. ހަމައެގޮތަށް، ވާހަކަ ދެއްކުމުގައި މަޑުމައިތިރިކަމާއި، އޯގާތެރިކަމާއިއެކު ވާހަކަދެއްކުމަށް ސަމާލުކަންދޭންޖެހެއެވެ. ހަމައެހެންމެ އަޑުއަހާ މީހާއަށް ބުަނަން ބޭނުންވާ ވާހަކަ ސާފުވާނެހެން ސާދާ އިބާރާތުން ވާހަކަ ދެއްކުން މުހިންމެވެ.
ރިވެތި ބަހުން މުޢާމަލާތް ކުރުމުގެ އިތުރުން ހީނަރުވެފައިވާ ގުޅުންތައް ބަދަހި ކުރުމަށްޓަކައި އެކަކު އަނެކަކަށް އެހީތެރިވެ، އިޚްތިރާމުކުރުމަކީ ކޮންމެހެން ކުރަން ޖެހޭ ކަމެކެވެ. މުޖްތަމަޢުގެ ހަމަޖެހުން ދެމެހެއްޓުމަށް ޓަކައި ބޭނުންޖެހިފައިވާ މީހުންނަށް އެހީތެރިވުން މުހިންމެވެ. ކުރާ ކޮންމެ ކަމެއްވެސް އެމީހަކަށް ވީ އެންމެ ފުރިހަމައަށް ކުރުމަށް ސަމާލުކަން ދޭންޖެހެއެވެ. އަމާ ބުނީތީ ފަރަށް ދާ އުސޫލުން ކަންކަން ނުކުރާށެވެ. ހަމައެފަދައިން ތިމާއަށް ވުރެ ބޮޑެތި މީހުންނަށް އިޚުތިރާމުކޮށް ކުޑަކުދިންނަށް އޯގާތެރިވުން މުހިންމެވެ.
މިގޮތައް ޢަމަލުތައް ބައްޓަން ކޮއްފިނަމަ ދޭދޭ ފަރުދުންގެ މެދުގައި ޖެހޭ މައްސަލަައް މަދުވެ، މުޖްތަމަޢަށް ދިމާވެފައިވާ ތަފާތު މައްސަލަތަކުން މުޖްތަމަޢު ރައްކާތެރިކުރެވޭނެއެވެ.
