އުޚްވަތްތެރިކަމަކީ ދެމީހެއްގެ ނުވަތަ ބައެއްގެ މެދުގައި އޮންނަ ވަރުގަދަ ގުޅުމެކެވެ. މުޖްތަމަޢުގެ ހަމަޖެހުން އޮތީ އުޚްވަތްތެރިކަމާއެކުގައެވެ. މުސްލިމުންނަށް ހައިބަތާއި ޤަދަރު، އާރާއި ބާރު އަދި ޝަރަފު ލިބޭނީ އުޚްވަތްތެރި ބައެއްގެ ގޮތުގައި ތިބެގެންނެވެ. ކަން މިހެން އޮތުމުގެ ސަބަބުން އުޚްވަތްތެރިކަން ދެމެހެއްޓުމަކީ އިސްލާމް ދީނުގައި ވެސް ނުހަނު ބާރުއަޅުއްވާފައިވާ ކަމެކެވެ. އުޚްވަތްތެރިކަމުގެ ގުޅުން ދެމެހެއްޓުމަކީ ކޮންމެހެން ވެސް ކުރަން ޖެހޭ ކަމެކެވެ.
އުޚްވަތްތެރިކަން ދެމެހެއްޓޭނެ ގޮތްތަށް ބައިވަރެވެ. އެގޮތުން، އަނެކުންނާ ދޭތެރޭ ތިމާގެ ހިތް ސާފުކޮށް ބެހެއްޓުމާއި، އެކަކު އަނެކަކާ މެދު ހިތުގައި އުފެދޭ ހަސަދަވެރިކަމާއި ނަފުރަތުން ދުރުހެލިވާށެވެ. އަދި އަނެކުންގެ ކިބައިން ތިމާ ނުރުހޭ ސިފައެއް ފެނުނަސް ކެތްތެރިވެ، ނަސޭހަތްދޭންޖެހޭ ފަދަ ކަންކަމުގައި ރިވެތި ގޮތުގައި ނަސޭހަތްދޭށެވެ. މިއީ އުޚްވަތްތެރިކަން ދެމެހެއްޓޭނެ ފަސޭހަ ދެގޮތެކެވެ.
މީގެ އިތުރުން އަނެކާގެ ފަރާތުން ދިމާވާ ނޭދެވޭ ކަމެއްގެ ބަދަލުގައި ތިމާގެ ފަރާތުން ކަނޑައަޅާ މޮޓޯ އަކީ މި ބަސް ކަމުގައި ހަދާށެވެ. ”ރަނގަޅު ކަންތަކާއި، ނުބައި ކަންތައް ހަމަހަމަވެގެނެއް ނުވެއެވެ. އެންމެހެޔޮ، ރިވެތި ގޮތުން ތިބާ (ނުބައިކަންތައް) ދުރުކުރާށެވެ! ފަހެ،އޭރުން ތިބާއާ އެމީހަކާ ދެމެދުގައި ދެކޮޅުވެރިކަމެއްވާ މީހާ، ގާތް ރަޙްމަތްތެރިޔަކު ފަދައިން ވެދާނެތެވެ.“ (ސޫރަތުލް ފުއްސިލަތް ގެ 34 ވަނަ އާޔަތުގެ މާނަ)
މުސްލިމުންގެ އަޚްވަންތަކަން ބަލިކަށުވެފައި އޮތުމުގެ ސަބަބުން ބައިނަލްއަޤްވާމީ ގޮތުން ބަލާއިރު އެމީހުންނަކީ ހައިބަތާއި ޤަދަރު ގެއްލިފައިވާ އާރެއް، ބާރެއް ނެތް ބައެކެވެ. ދިވެހި މުޖްތަމަޢަށް ދިމާވެފައިވާ ތަފާތު ނުރައްކާތެރި އެތައް މައްސަލަތަކުގެވެސް މައިގަނޑު އެއް ހައްލަކީ އިސްލާމީ އުޚުއްވަތްތެރިކަން ބަދަހި ކުރުމެވެ. ބަދަހިކޮށް އަތުރާލެވިފައިވާ ގާތަކުން ބިނާއަށް ބާރުދޭ ފަދައިން އުޚުއްވަތްތެރިކަމުން އިސްލާމީ މުޖްތަމަޢު ވަރުގަދަ ކޮށްދެއެވެ. ކަންމިހެން އޮތުމުގެ ސަބަބުން ކޮންމެ ފަރުދަކީ ވެސް ފަރުދީ ޒިންމާ އަދާ ކުރާ މީހަކަށް ވަމާތޯއެވެ.
