އއ. ފެރިދޫގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، އެ ތަކެތި ގެންގުޅެ އަދި ބޭނުންކުރާ ކަމަށް ތުހުމަތުކުރެވޭ މައްސަލައެއްގައި ދެ މީހަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފުލުހުންގެ ޚިދުމަތުން މަޢުލޫމާތު ދެއްވި ގޮތުގައި، މި މައްސަލައާ ގުޅިގެން ހައްޔަރުކޮށްފައި ވަނީ އއ. ފެރިދޫ / ރޯޒްމީޑް، އުމުރުން 44 އަހަރުގެ އާދަމް ނިމާލް އަދި އެ ރަށު ބިލަމަގުމާގޭ، އުމުރުން 43 އަހަރުގެ ޢަލީ ޢާމިރެވެ. މި ދެ މީހުން ހައްޔަރުކޮށްފައި ވަނީ ފެރިދޫ ޕޮލިހާއި، ހިމަންދޫ ޕޮލިސް އަދި މާޅޮސް ޕޮލިސް ގުޅިގެން އެ ރަށުގައި ހިންގި ޚާއްސަ އޮޕަރޭޝަންތަކެއްގައެވެ.
ފުލުހުން ހާމަކުރި ގޮތުގައި، މި މަހުގެ 19 ވަނަ ދުވަހު ހިންގި އޮޕަރޭޝަންގައި އާދަމް ނިމާލް ހައްޔަރުކޮށް، އޭނާ ދިރިއުޅޭ ގެ ބަލައި ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 21 ރަބަރު ޕެކެޓާއި، މަސްތުވާތަކެތި ވިއްކައި ވިޔަފާރިކުރުމަށް ގެންގުޅޭ ކަމަށް ބެލެވޭ ބައެއް ތަކެތި ވަނީ ފެނިފައެވެ.
މީގެ އިތުރުން، މި މަހުގެ 20 ވަނަ ދުވަހު ހިންގި އޮޕަރޭޝަންގައި ޢަލީ ޢާމިރު ހައްޔަރުކޮށް، ކޯޓު އަމުރެއްގެ ދަށުން އޭނާ ދިރިއުޅޭ ގެ ފާސްކުރިއިރު މަސްތުވާތަކެތި ކަމަށް ބެލެވޭ އެއްޗެއް ހުރި 42 ރަބަރު ޕެކެޓުގެ އިތުރުން ދެ ސެލޯފިންކޮޅު ފެނިފައިވާ ކަމަށް ފުލުހުން ބުނެއެވެ.
މި މައްސަލައާ ގުޅިގެން ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޢަލީ ޢާމިރުގެ ބަންދަށް 30 ދުވަސް އަދި އާދަމް ނިމާލްގެ ބަންދަށް 15 ދުވަހުގެ މުއްދަތެއް ކޯޓުން ވަނީ ދީފައެވެ.
މި ދެ މައްސަލަވެސް ފުލުހުން ދަނީ އިތުރަށް ތަޙުޤީޤު ކުރަމުންނެވެ.














