ކުޑަކުއްޖަކާ ބެހުނުކަމުގެ ތުހުމަތުގައި ހައްޔަރުކުރި ކުރީގެ ފޮރިން މިނިސްޓަރު އަބްދުﷲ ޝާހިދާއި ކުރީގެ ސްޓޭޓް މިނިސްޓަރު ޒިފްލީނާ ހަސަން (ޒިފްލީން) ރާއްޖޭގައި ކައިވެނި ރަޖިސްޓްރީ ކޮށްފައި ނުވާކަން ރާއްޖޭގެ ފެމިލީ ކޯޓުގެ ރެކޯޑުތަކުން ކަށަވަރުވެއްޖެ އެވެ.
ދެ މީހުންގެ ދެމެދުގައި ރަސްމީ ކައިވެންޏެއް ނެތް ނަމަވެސް، ދޮންދަރިއަކަށް ޖިންސީ ގޯނާކުރި ކަމުގެ ތުހުމަތުގައި ޝާހިދު ހައްޔަރުކޮށްފައި ވަނީ ޒިފްލީން ދިރިއުޅޭ ހުޅުމާލޭ ރެއިންބޯ އޯޝަން ފްރޮންޓް އެޕާޓްމެންޓުންނެވެ. ޝާހިދާއި ޒިފްލީން ކައިވެނިކޮށްގެން އުޅޭ ކަމަށް އަޑުފެތުރިފައި އޮންނަތާ ގިނަ ދުވަސްތަކެއް ވީ ނަމަވެސް، މިހާތަނަށް ދެ މީހުން ކުރެ އެކަކުވެސް އެކަން ރަސްމީކޮށް ހާމަކޮށްފައެއް ނުވެ އެވެ.
މި މައްސަލައިގައި ޝާހިދު 30 ދުވަހަށް ބަންދުކުރުމަށް ކްރިމިނަލް ކޯޓުން ނެރުނު އަމުރު ހައި ކޯޓުގައި އިސްތިއުނާފު ކުރުމުން، ދިފާއުގައި އޭނާ ބުނެފައިވަނީ އޭނާގެ ދޮންދަރިއެއް ނުހުންނަ ކަމަށެވެ. އެހެންކަމުން، އިތުބާރު ކުރެވޭ މަގާމެއްގައި ހުރި މީހަކު ކުޑަކުއްޖަކާ މެދު ޖިންސީ އަމަލެއް ހިންގި ކަމަށް ބުނެ ތުހުމަތު ފޯމުގައި ހިމަނާފައި ވަނީ ގާނޫނާ ހިލާފަށް ކަމަށް ޝާހިދުގެ ފަރާތުން ކޯޓުގައި ވަކާލާތު ކުރި އެވެ.
އެހެން ނަމަވެސް، ޕްރޮސިކިއުޓާ ޖެނެރަލްގެ އޮފީހުން ކޯޓުގައި ފާހަގަކުރި ގޮތުގައި ތަހުގީގަށް ލިބިފައިވާ ބަޔާންތަކުން ކުއްޖާ ޝާހިދަށް މުހާތަބު ކުރަނީ ”ބައްޕި“ ގެ ގޮތުގަ އެވެ. އަދި ޝާހިދަކީ ކުއްޖާގެ ދޮންބައްޕަ ކަމަށް އެ ކުއްޖާ ގަބޫލުކުރާކަން އެނގޭ ފަދަ ކަންތައްތަކެއް ހުރި ކަމަށް ވެސް ދައުލަތުން ބުންޏެވެ.
މި މައްސަލަ ފުލުހުންނަށް ހުށަހެޅީ އަނިޔާ ލިބުނު ކުއްޖާ ކިޔަވާ ސްކޫލުގެ ކައުންސިލަރަށް އެ ކުއްޖާ ކިޔައިދިން ވާހަކަތަކަކާ ގުޅިގެން އެ ސްކޫލުންނެވެ. ސްކޫލް ކައުންސިލަރު ވަނީ ކުއްޖާ ދެއްކި ވާހަކަތަކުގެ ބަޔާނެއް ފުލުހުންނަށް ދީފަ އެވެ.
މައްސަލައިގެ އިސްތިއުނާފު އަޑުއެހުންތަކަށް ފަހު ހައި ކޯޓުން މިއަދު އިއްވި ހުކުމުގައި ބުނެފައި ވަނީ، ޝާހިދު ހައްޔަރުކޮށް ގާނޫނީ އިންޒާރު ދިން އިރުވެސް އެ ކުށުގެ ތުހުމަތު އޭނާގެ މައްޗަށް ކޮށްފައިވާ ކަމަށެވެ. އަދި ތަހުގީގުގެ މި މަރުހަލާގައި ކުއްޖާގެ ސީދާ ބަޔާނެއް ނެތް ނަމަވެސް، ކުއްޖާ އެ ވާހަކަތައް ކިޔައިދިން ފަރާތުގެ ބަޔާނާއި އެހެނިހެން ހެކިތަކަށް ބަލާއިރު ކޮންމެވެސް މިންވަރެއްގެ ތުހުމަތެއް އުފެދޭ ކަމަށް ހުކުމުގައިވެ އެވެ.
އެ ސަބަބުތަކަށް ރިއާޔަތްކޮށް، ޝާހިދު ބަންދުކުރުމަށް ކްރިމިނަލް ކޯޓުން ނެރުނު އަމުރު ބާތިލު ކުރަންޖެހޭ ތަނެއް ނެތް ކަމަށް ހައި ކޯޓުން ވަނީ ކަނޑައަޅާފަ އެވެ.











