ސައުދީ އަރަބިއްޔާގެ އަލް ނަސްރަށް ކުޅެމުން އަންނަ ދުނިޔޭގެ މަޝްހޫރު ފުޓްބޯޅަ ތަރި ކްރިސްޓިއާނޯ ރޮނާލްޑޯ، އޭނާގެ ކެރިއަރުގެ 986 ވަނަ ލަނޑު ރޭ ކާމިޔާބުކޮށްފިއެވެ. އޭނާގެ ފުޓްބޯޅަ ހަޔާތުގައި 1000 ލަނޑު ހަމަކުރުމަށް އަމާޒު ހިފައިގެން މަސައްކަތް ކުރަމުންދާ ރޮނާލްޑޯ މި ލަނޑު ޖަހާފައިވަނީ ސައުދީ ޕްރޯ ލީގުގައި އަލް އަހްލީއާ ދެކޮޅަށް ކުޅުނު މެޗުގައެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ 14 ވަނަ މިނިޓުގައި ރޮނާލްޑޯ ވަނީ މޮޅު ލަނޑެއް ޖަހައި އަލް ނަސްރަށް މެޗުގެ ކުރި ހޯދައިދީފައެވެ. އަދި އޭގެ ހަތަރު މިނިޓު ފަހުން ލީޑު ފުޅާކުރުމަށް ރޮނާލްޑޯއަށް ރަނުގެ ފުރުސަތެއް ލިބުނެވެ. ނަމަވެސް، އަލް ނަސްރަށް ލިބުނު ޕެނަލްޓީ އޭނާ ފޮނުވާލުމުން އަމާޒުވީ ގޯލުގެ ދަނޑިއަށެވެ.
ރޮނާލްޑޯގެ ލަނޑާއެކު އަލް ނަސްރު ކުރީގައި އޮތް ނަމަވެސް، ފުރަތަމަ ހާފުގެ ކުޅުން ނިމުމުގެ ކުރިން އަލް އަހްލީގެ ގަލޭނޯ ވަނީ ލަނޑެއް ޖަހައި މެޗުގެ ނަތީޖާ އެއްވަރުކޮށްފައެވެ.
މެޗުގެ ދެވަނަ ހާފުގައި އަލް އަހްލީން ކުޅުން ވަރުގަދަކުރިއިރު، އެ ޓީމަށް ލިބުނު ޕެނަލްޓީއަކުން އިވާން ޓޯނީ ވަނީ ލަނޑު ޖަހައި މެޗުގެ ލީޑު އެ ޓީމަށް ނަގައިދީފައެވެ. އަދި މެޗުގެ 71 ވަނަ މިނިޓުގައި ރޮޖާ އިބަނޭޒް ކާމިޔާބުކުރި ލަނޑާއެކު އަލް އަހްލީން ވަނީ 3-1 ގެ ނަތީޖާއަކުން އަލް ނަސްރުގެ މައްޗަށް ކުރި ހޯދައި މެޗު ކާމިޔާބުކޮށްފައެވެ.














