ކުޑަކުދިންނަށް ކުރާ އަނިޔާގެ އަމަލުތައް ކަމާބެހޭ އިދާރާތަކަށް ރިޕޯޓްކުރުމަކީ ދިވެހިރާއްޖޭގެ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުން ކޮންމެ ދިވެހި ފަރުދަކަށްވެސް ލާޒިމުކުރާ ކަމެއް ކަމަށް ޞިއްޙަތާއި ޢާއިލާއާއި އިޖުތިމާއީ އެހީއާ ބެހޭ ވުޒާރާއިން މިއަދު ހަނދާންކޮށްދީފިއެވެ.
ބައިނަލްއަގުވާމީ ގޮތުން ފާހަގަކުރާ ކުޑަކުދިން އަނިޔާއިން ރައްކާތެރިކުރުމުގެ ދުވަހާ ގުޅިގެން އެ ވުޒާރާއިން ނެރުނު ނޫސްބަޔާނެއްގައި ބުނީ، ކޮންމެ އަހަރެއްގެ ވެސް ނޮވެމްބަރު މަހުގެ 19 ވަނަ ދުވަހަކީ ކޮންމެ ކުއްޖަކީވެސް ރައްކާތެރި އަދި ކުލުނުވެރި މާހައުލެއްގައި އުޅެބޮޑުވުމުގެ ހައްގު ލިބިގެންވާ ކުއްޖެއްކަން ހަނދާން އާކޮށްދޭ ދުވަހެއް ކަމަށެވެ. އަދި ކުޑަކުދިން އަނިޔާއިން ރައްކާތެރިކުރުމަށް މަސައްކަތްކުރުމަކީ ހަމަ ކޮންމެ ފަރުދެއްގެވެސް ޒިންމާއެއް ކަމަށް އެ ބަޔާނުގައި ފާހަގަކޮށްފައިވެއެވެ.
އަނިޔާއަށް ހުށަހެޅިފައިވާ ކުދިން ދެނެގަތުމަށްޓަކައި، އަނިޔާ ލިބެމުން އަންނަ ކުދިންގެ ކިބައިން ފެނިދާނެ ނިޝާންތަކަކީ ކޮބައިކަން ދެނެގަނެ، އެކަންކަމަށް ސަމާލުވުމަށް މިނިސްޓްރީން ވަނީ އިލްތިމާސްކޮށްފައެވެ. އަދި ކުދިންނަށް ކުރާ އަނިޔާތައް ރިޕޯޓްކުރުމުން އެކުދިންގެ ރައްކާތެރިކަން ކަށަވަރުކޮށްދީ، އެ އުނދަގޫ ހާލަތުން އަރައިގަނެ ވިލުންތެރި ބަޔަކަށް ހެދުމަށް ދައުލަތުގެ މުއައްސަސާތަކުން ކުރާ މަސައްކަތުގައި މުޖުތަމައުގެ ދައުރު އޮތުމަކީ ނުހަނު މުހިންމު ކަމެއް ކަމަށް ވެސް ބުނެފައިވެއެވެ.
މީގެއިތުރުން، ތިމާގެ ފަރާތުން ކުޑަކުއްޖެއްގެ ރައްކާތެރިކަމަށް އަސަރުކުރާނެ ފަދަ އެއްވެސް ކަމެއް ވިޔަނުދިނުމަށާއި، އެހެން މީހެއްގެ ފަރާތުން އެފަދަ ކަމެއް ކުރިމަތިވިޔަ ނުދީ ހުއްޓުވަން މަސައްކަތްކުރުމަކީ ކޮންމެ މީހެއްގެވެސް އަޒުމަކަށް ހަދަންޖެހޭ ކަމަށް މިނިސްޓްރީން ބުންޏެވެ. ކުޑަކުދިންނަށް އަމާން އަދި ރައްކާތެރި ތަނަކަށް ރާއްޖެ ހެދޭނީ ކުދިން ރައްކާތެރިކުރުމުގައި އެންމެންގެ ބައިވެރިވުން އިތުރުކޮށްގެން ކަމަށް ވެސް އެ ބަޔާނުގައި ވަނީ ބަޔާންކޮށްފައެވެ.













