ރައްޔިތުންގެ މަޖިލީހުގެ ޖަލްސާގައި ކުރިއަށްދިޔަ ރިއަލް އެސްޓޭޓް ވިޔަފާރީގެ ބިލުގެ ބަހުސްގެ ތެރެއިން، އެ ބިލާމެދު އޮތް ބޮޑު ނުރުހުން ފާޅުކުރެއްވުމުގެ ގޮތުން ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު މަޖިލީހުގެ ތަޅުމުގައި އެ ބިލް ވީދާލައްވައިފިއެވެ.
މަޖިލީހުގެ އިއްޔެގެ މެންދުރުފަހުގެ ދަންފަޅީގައި ވާހަކަފުޅު ދައްކަވަމުން މައުރޫފް ވިދާޅުވީ، ރައްޔިތުންނަށް ގެއްލުންވާނެ ގިނަ ކަންބޮޑުވުންތަކެއް މި ބިލުގައި ހިމެނޭ ކަމަށެވެ.
ޚާއްޞަކޮށް، މި ބިލަކީ ރަސްމާލެ މަޝްރޫޢުގެ ދަށުން ހިއްކާ ބިމުން ބައެއް ބޭރުގެ ފަރާތްތަކަށް ދިނުމަށް މަގުފަހިކުރުމުގެ ނިޔަތުގައި ސަރުކާރުން ހުށަހަޅާފައިވާ ބިލެއް ކަމަށް އޭނާ ތުހުމަތު ކުރެއްވިއެވެ.
މި މައްސަލައިގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ފާޑުވިދާޅުވަމުން މައުރޫފް ފާހަގަކުރެއްވީ، ދައުލަތުގެ ބަޖެޓުން އެއްވެސް ޚަރަދެއް ނުކޮށް ރަސްމާލެ ހިއްކައި، އެ ބިމުން އެންމެ ވެލިފުކެއްވެސް ބޭރުގެ ފަރާތަކަށް ނުދެއްވާނެ ކަމަށް ރައީސް ކުރިން ވިދާޅުވެފައިވާ ކަމަށެވެ. ނަމަވެސް ރައީސް އެ ވާހަކަފުޅާ ޚިލާފުވެވަޑައިގެން، ހިއްކުމަށް ދިޔަ ޚަރަދާއި ރައްޔިތުންނަށް އެކަށީގެންވާ އާމްދަނީއެއް ނުލިބޭ ގޮތަށް ބޭރުގެ ބަޔަކަށް އެ ބިން ދޫކޮށްލުމަށް ނިންމަވާފައިވާ ކަމަށް އޭނާ ވިދާޅުވިއެވެ.
މީގެ އިތުރުން، ޤައުމު އިޤްތިޞާދީ ގޮތުން ނާޒުކު ޙާލަތެއްގައި އޮންނަ ދަނޑިވަޅުތަކުގެ ބޭނުން ހިފައިގެން އިސްތިޢުމާރީ ބާރުތަކުން ޤައުމުތަކަށް ނުފޫޒު ފޯރުވާ ކަމަށާއި، ރަސްމާލެ މަޝްރޫޢަކީވެސް އެފަދަ ކަމެއްގެ ގޮތުގައި މައުރޫފް ސިފަކުރެއްވިއެވެ.
ބަހުސްގެ ތެރެއިން މައުރޫފްގެ ވާހަކަފުޅު ކުރިއަށް ދަނިކޮށް މައިކުގެ އަޑު ކެނޑުމުން، އޭނާ ކޮޅަށް ތެދުވެވަޑައިގެން އިތުރު ފުރުޞަތަކަށް އެދިވަޑައިގަތެވެ. އެމްޑީޕީ ޕާލިމެންޓްރީ ގްރޫޕްގެ ލީޑަރުގެ އެދިވަޑައިގަތުމާއެކު ރިޔާސަތުން އިތުރު ފުރުޞަތު ދެއްވުމުން، ބިލަށް ބަހުސްކުރުމުގެ ފުރުޞަތު ހަނިކުރަމުންދާ ކަމަށް ވިދާޅުވެ މައުރޫފް ވަނީ އަތްޕުޅުގައި އޮތް ބިލް ވީދާލައްވާފައެވެ.
މި ޢަމަލާ ގުޅިގެން މަޖިލީހުގެ ރައީސް ޢަބްދުއްރަޙީމް ޢަބްދުﷲ ވަނީ މެންބަރު މައުރޫފަށް ހަރުކަށި އިންޒާރު ދެއްވާފައެވެ. މައިކު ކަނޑާލެއްވީ ބަހުސްކުރުމަށް ލިބިވަޑައިގެންނެވި ވަގުތު ހަމަވުމުން ކަން ފާހަގަކުރައްވައި، މަޖިލީހުގެ ތަޅުމުގައި ލިޔުމެއް ވީދާލުމަކީ ގަވާއިދާ ޚިލާފު މަނާ ކަމެއް ކަމަށް ވިދާޅުވެ އެފަދަ ޢަމަލުތައް ތަކުރާރު ނުކުރުމަށް ރިޔާސަތުން ނަޞޭޙަތްތެރިވެވަޑައިގެންނެވިއެވެ.
ރައްޔިތުންގެ މަޖިލީހުގެ ގަވާއިދުގައި ބަޔާންކޮށްފައިވާ ގޮތުން، ހުށަހެޅިފައިވާ މައްސަލައަކާ މެދު ނުރުހުން ފާޅުކުރުމުގެ ގޮތުން ޖަލްސާގައި އެއްވެސް ލިޔުމެއް ވީދާލުން ނުވަތަ އެއްލާލުމަކީ މަނާ ކަމެކެވެ. އަދި އެފަދަ ޢަމަލެއް ހިންގާ މެންބަރަކާ މެދު ސުލޫކީ ފިޔަވަޅު އެޅުމުގެ ބާރު މަޖިލީހުގެ ގަވާއިދުން ލިބިދެއެވެ.














