މާލޭގައި ތަރައްޤީކުރަމުން އަންނަ ސާރފިންގ ސްޓޭޑިއަމްގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށާއި، ރާޅާއެޅުންތެރިންނަށް ވެވަޑައިގެންނެވި ވަޢުދާ އެއްގޮތަށް އެ މަޝްރޫޢު ނިންމަވައި ދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ އެމަނިކުފާނުގެ ރަސްމީ ސޯޝަލް މީޑިއާ އެކައުންޓްތައް މެދުވެރިކުރައްވައި ކުރެއްވި ޕޯސްޓެއްގައެވެ.
ރައީސް މުޢިއްޒު ވިދާޅުވީ، ސާރފިންގ ސްޓޭޑިއަމް ތަރައްޤީ ކުރުމުގެ މަސައްކަތް މިހާރު ކުރިއަށްދަނީ ފުލް ސްވިންގްގައި، ވަރަށް ބާރު ސްޕީޑުގައި ކަމަށެވެ. އަދި މާލޭގެ ރާޅާއެޅުންތެރިންގެ މުޖުތަމަޢަށް ވަރަށް ބޮޑަށް ބޭނުންވެފައިވާ މި ކުޅިވަރު އުމްރާނީ ވަސީލަތް، ވެވަޑައިގެންނެވި ވަޢުދާ އެއްގޮތަށް ނިންމަވައި ރައްޔިތުންނާ ޙަވާލުކުރައްވާނެ ކަމުގެ ޔަޤީންކަން އެމަނިކުފާނު ދެއްވިއެވެ.
މީގެއިތުރުން، އެހެނިހެން ކުޅިވަރުތަކާ ގުޅުންހުރި ކުޅިވަރު އުމްރާނީ ތަރައްޤީގެ ގިނަ މަޝްރޫޢުތައްވެސް މިހާރު ވަނީ ރަނގަޅު މިސްރާބަކަށް އެޅި، ފުރިހަމައަށް ކުރިއަށްދާން ފަށާފައި ކަމަށްވެސް ރައީސްގެ ޕޯސްޓުގައި ފާހަގަކުރައްވާފައިވެއެވެ.
ސަރުކާރުން އަންނަނީ ރާއްޖޭގައި ކުޅިވަރުގެ ދާއިރާ ކުރިއެރުވުމަށާއި، ޒުވާނުންނަށް ބޭނުންވާ ޒަމާނީ ވަސީލަތްތައް ޤާއިމުކޮށްދިނުމަށް ގިނަގުނަ މަސައްކަތްތަކެއް ކުރަމުންނެވެ.














