ވާދަވެރި ފައިނަލް މެޗުގައި ދިވެހި ސިފައިންގެ ކުލަބު ބަލިކޮށް، މި އަހަރުގެ ގައުމީ ބިލިއާޑް މުބާރާތުގެ ޓީމު އިވެންޓުގެ ޗެމްޕިއަންކަން މިބްސާއިން ހޯދައިފިއެވެ.
ގައުމީ ބިލިއާޑް ސެންޓަރުގައި ރޭ ކުޅުނު ފައިނަލް މެޗު މިބްސާއިން ކާމިޔާބުކުރީ 3-2 ގޭމުންނެވެ. މި މެޗުގައި މިބްސާއިން 9-5، 9-6 އަދި 9-3 ފްރޭމުން ކުރިހޯދިއިރު، ސިފައިންގެ ކުލަބުން މޮޅުވި ދެ ގޭމް ކާމިޔާބުކުރީ 9-6 އަދި 7-9 ފްރޭމުންނެވެ.
ފައިނަލަށް ދަތުރުކުރުމަށް މިބްސާއަށް ސެމީ ފައިނަލުގެ ދެ މެޗެއް ކުޅެން ޖެހުނެވެ. އެ ގޮތުން ދެވަނަ ސެމީގައި ނިއު ރޭޑިއަންޓް ސްޕޯޓްސް ކުލަބުގެ މައްޗަށް ކުރިހޯދުމަށްފަހު، ތިންވަނަ ސެމީގައި ކުލަބު ޓީނޭޖް ބަލިކޮށް އެ ޓީމުން ވަނީ ފައިނަލުގެ ޖާގަ ކަށަވަރުކޮށްފައެވެ. ސިފައިންގެ ކުލަބު ފައިނަލަށް ދިޔައީ ފުރަތަމަ ސެމީގައި ކުލަބު ޓީނޭޖް ބަލިކޮށްގެންނެވެ.
ފައިނަލް މެޗަށްފަހު ބޭއްވި ރަސްމިއްޔާތުގައި މުބާރާތުގެ ވަނަތަކަށް ހޮވުނު ފަރާތްތަކަށް ޓްރޮފީ އާއި މެޑެލް ހަވާލުކޮށްދެއްވީ ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢުއެވެ.
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކުރާ މި މުބާރާތުގެ ޓީމު އިވެންޓުގައި ޖުމްލަ 10 ކުލަބަކުން ވާދަކުރިއެވެ. އެއީ މިބްސާ އާއި ދިވެހި ސިފައިންގެ ކުލަބުގެ އިތުރުން ކުލަބު ޓީނޭޖް، ޒެފްރޯލް، ކީން ސްޕޯޓްސް ކުލަބު، ފުއްލާޒް ރެކްރިއޭޝަން ކުލަބު، ބްލަޑް ބްރަދާސް ސްޕޯޓްސް ކުލަބު، ފްލެކްސަރ ސްޕޯޓްސް ކުލަބު، އެޕެކްސް ސްޕޯޓްސް ކުލަބު އަދި ނިއު ރޭޑިއަންޓް ސްޕޯޓްސް ކުލަބެވެ.
މި އަހަރުގެ ގައުމީ ބިލިއާޑް މުބާރާތުގައި ސިންގަލްސް އަދި ޑަބަލްސްގެ ގިނަ ކެޓެގަރީތަކެއް ހިމެނެއެވެ. ސިންގަލްސް ބައިން އެންމެ ގިނަ ކުޅުންތެރިން ވާދަކުރީ 75 ކުޅުންތެރިން ބައިވެރިވި ފިރިހެން ދެވަނަ ޑިވިޝަނުގައެވެ. މީގެ އިތުރުން ފިރިހެން ފުރަތަމަ ޑިވިޝަނުގައި 29 ކުޅުންތެރިން ވާދަކުރާއިރު، އަންހެން ސިންގަލްސްގައި 18 ކުޅުންތެރިން ވާދަކުރެއެވެ.
ޑަބަލްސް އިވެންޓުތަކަށް ބަލާއިރު ފިރިހެން ޑަބަލްސްގައި 46 ޕެއާ، އަންހެން ޑަބަލްސްގައި 8 ޕެއާ އަދި މިކްސްޑް ޑަބަލްސްގައި 18 ޕެއާ ބައިވެރިވެފައިވެއެވެ.
ޖުމްލަ 400 އަށްވުރެ ގިނަ މެޗު ކުޅެވޭ މި މުބާރާތަކީ ރާއްޖޭގައި ބިލިއާޑް ކުޅުން ކުރިއަރަމުންދާ މިންވަރު ދައްކުވައިދޭ، އަދި ގައުމީ ފެންވަރުގައި ވާދަކުރުމުގެ ފުރުސަތު ކުޅުންތެރިންނާއި ކުލަބުތަކަށް ފަހިކޮށްދޭ މުހިންމު މުބާރާތެއް ކަމަށް އެމްޕީބީއޭއިން ފާހަގަކުރެއެވެ.













