ފުލުހުންގެ ޚިދުމަތުގެ ޕްރޮފެޝަނަލް މިންގަނޑުތައް އިތުރަށް ހަރުދަނާކޮށް އިންސާނީ ކަރާމާތް ރައްކާތެރިކުރުމުގެ ގޮތުން، ފުލުހުންނަށް ދެވޭ ތަމްރީނު ޕްރޮގްރާމުތަކުގައި ’އިހުތިރާމުކުރުން‘ ވަކި މޮޑިއުލެއްގެ ގޮތުގައި ކިޔަވައިދިނުމަށް ދިވެހި ފުލުހުންގެ ޚިދުމަތުން ނިންމައިފިއެވެ.
މި ނިންމުމާ ގުޅޭގޮތުން ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވީ، ފުލުހުން ހިންގާ އަސާސީ ތަމްރީނުތަކުގެ އިތުރުން ޚާއްޞަ އޮޕަރޭޝަނަލް އަދި ޓެކްނިކަލް ތަމްރީނު ޕްރޮގްރާމުތަކުގައި ވެސް މި މޮޑިއުލް ހިމަނާނެ ކަމަށެވެ.
ލ. ހިތަދޫ ޕޮލިސް ސްޓޭޝަން ރަސްމީކޮށް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރު ފާހަގަކުރެއްވި ގޮތުގައި، މިއީ އެކަކު އަނެކަކަށް އިހުތިރާމުކުރުމުގެ ސަގާފަތެއް ރާއްޖޭގައި އަށަގެންނެވުމަށް ޤައުމީ ފެންވަރުގައި ފެށި ކެމްޕޭނާ ގުޅުވައިގެން އެޅުއްވި ފިޔަވަޅެކެވެ.
އިހުތިރާމުކުރުމުގެ ސަގާފަތް ދިރުވައި އާލާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައިގެން ކުރިއަށްގެންދަވާ ޤައުމީ ކެމްޕޭން ރަސްމީކޮށް އިފްތިތާޙުކޮށްފައިވަނީ ހޮނިހިރު ދުވަހުގެ ރޭގައެވެ.
މި ޤައުމީ މަޝްރޫޢުގެ މައިގަނޑު އަމާޒަކީ ދިވެހިންގެ ތެރޭގައި އޮތް ރިވެތި އާދަކާދަތަކާއި އިސްލާމީ މަތިވެރި އަޚްލާޤުގެ އިތުރުން، އެކަކު އަނެކަކަށް އޮންނަ އިޙްތިރާމުގެ ގުޅުން ޒަމާނީ މުޖުތަމަޢުގައި އަލުން ދިރުވައި އާލާކުރުމެވެ.
ކެމްޕޭން އިފްތިތާޙުކުރުމުގެ ޖަލްސާގައި ރައީސް ޑރ. މުޢިއްޒު ވަނީ ސައްތައިން ސައްތަ މުސްލިމް ޤައުމެއްގެ ހައިސިއްޔަތުން އެކަކު އަނެކަކަށް ޤަދަރާއި އިޙްތިރާމާއެކު މުޢާމަލާތުކުރުމުގައި ދިވެހިން ނަމޫނާ ބަޔަކަށް ވުމަށް އެދިވަޑައިގެންފައެވެ.
އަދި ބުލީކުރުމާއި، މީހުންގެ އަބުރު ކެނޑުމާއި، ދޮގު ވާހަކަ ފެތުރުން ފަދަ ނުރަނގަޅު އާދަތަކުން މުޖުތަމަޢު ސަލާމަތްކުރުމަށް އެމަނިކުފާނު ވަނީ އިލްތިމާސްކުރައްވާފައެވެ.
މީގެ އިތުރުން ޢާއިލާތަކުގެ ތެރޭގައާއި ރަޙްމަތްތެރިންގެ މެދުގައި އަދި މުޅި ޤައުމުގެ އަމަންއަމާންކަމާއި ރީތި ނަން ދެމެހެއްޓުމަށްޓަކައި އެކަކު އަނެކަކަށް އިހުތިރާމުކުރުމަކީ ކޮންމެހެން މުހިންމު ކަމެއް ކަމަށް ވެސް ރައީސް ވިދާޅުވިއެވެ.












