އިޙްތިރާމް އަދާކުރުމުގެ ޤައުމީ މަޝްރޫޢުގެ ޢަމަލީ މަސައްކަތްތައް އަންނަ ޖެނުއަރީ މަހު ފެށުމަށް ތައްޔާރުވަމުންދާއިރު، އޭގެ ކުރިން އެންމެ އިސްކަމެއް ދީގެން ކުރިއަށް ގެންދާނީ އެ މަޝްރޫޢު ހިންގާނެ މުދައްރިބުން ތަމްރީނުކުރުމުގެ މަސައްކަތް ކަމަށް މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް ހީނާ ވަލީދު ވިދާޅުވެއްޖެއެވެ.
މި މަޝްރޫޢު ރަސްމީކޮށް އިފްތިތާޙުކުރުމުގެ ރަސްމިއްޔާތަށްފަހު މިނިސްޓަރު ވިދާޅުވީ، ރާއްޖޭގެ ހުރިހާ ރަށެއްގައާއި އެކި މުއައްސަސާތަކުގެ އިތުރުން ޖަމްޢިއްޔާ ޖަމާޢަތްތަކުގައި މި މަސައްކަތް ކުރިއަށް ގެންދިއުމަށްޓަކައި މަންދޫބުން ތަމްރީނުކުރުމާއި ޗެމްޕިއަން ކުރާނެ ފަރާތްތައް ކަނޑައެޅުމުގެ މަސައްކަތް ވަރަށް އަވަހަށް ފެށިގެންދާނެ ކަމަށެވެ.
ކުރިއަށް އޮތް ފަސް އަހަރުދުވަހުގެ މުއްދަތަށް ބަހާލައިގެން މެދުނުކެނޑި ހިންގުމަށް ރޭވިފައިވާ މި ޤައުމީ މަޝްރޫޢުގެ ދަށުން، ޖެނުއަރީ މަހުން ފެށިގެން މުޖުތަމަޢު އަހުލުވެރިކުރުވުމުގެ ޕްރޮގްރާމްތައް ކުރިއަށްދާނީ ކޮންމެ މަހަކަށްވެސް ވަކި ޚާއްޞަ ތީމުތަކެއް ނުވަތަ މައުޟޫޢުތަކެއް ކަނޑައަޅައިގެންނެވެ.
މި ގޮތަށް ކަނޑައެޅޭ ރިވެތި ސިފަތަކަށް ރައްޔިތުން އަހުލުވެރިކުރުވުމުގެ މަސައްކަތް މުޖުތަމަޢުގެ އެންމެން ގުޅިގެން ކުރިއަށް ގެންގޮސްފިނަމަ، ދިވެހިންގެ ތެރޭގައި އޮތް ރިވެތި އާދަކާދަތައް އަލުން އިޔާދަކުރެވި، ދިވެހި މުޖުތަމަޢަކީ ރަނގަޅު އަޚްލާޤީ ސިފަތަކުން ޒީނަތްތެރިވެފައިވާ ތަނަކަށް ވެގެންދާނެ ކަމުގެ ފުރިހަމަ ޔަޤީންކަން އެބައޮތް ކަމަށްވެސް މިނިސްޓަރު ހީނާ ވަލީދު ފާހަގަކުރެއްވިއެވެ.













