ޔުއެފާ ނޭޝަންސް ލީގުގައި ރޭ އަމިއްލަ ދަނޑުގައި ޑެންމާކާ ދެކޮޅަށް ކުޅުނު މެޗުން 4-1 ގެ ތަފާތު ބޮޑު ނަތީޖާއަކުން ބަލިވެ، ކެޕްޓަން ކްރިސްޓިއާނޯ ރޮނާލްޑޯ ގައުމީ ޓީމުން ރިޓަޔާކުރި ފަހުން ޕޯޗުގަލް ކުޅުނު ފުރަތަމަ މެޗު ހިތި ގޮތަކަށް ނިންމާލަން ޖެހިއްޖެއެވެ.
ތޭވީސް އަހަރު ވަންދެން ގައުމީ ޖޯޒީގައި ހިދުމަތް ކުރުމަށްފަހު ރޮނާލްޑޯ ކުޅުން ހުއްޓާލުމާ ގުޅިގެން، އޭނާގެ ޝަރަފުގައި ރޭގެ މެޗަށް ޕޯޗުގަލްގެ ހުރިހާ ކުޅުންތެރިން ވެސް ދަނޑަށް ނުކުތީ ހަތް ނަންބަރު ޖޯޒީގައެވެ. މީގެ އިތުރުން ދަނޑުގެ މެސްކޮޓް ވެސް ހަތް ނަންބަރު ޖޯޒީގައި ހުރިއިރު، ސަޕޯޓަރުން ވަނީ ރޮނާލްޑޯއަށް ހާއްސަ ބެނާއަކާއެކު ”ޝުކުރިއްޔާ ކެޕްޓަން“ ލިޔެފައިވާ މެސެޖެއް ދައްކާލައި އޭނާއަށް އިހުތިރާމް އަދާކޮށްފައެވެ.
ޕޯޗުގަލްގެ ބްރާގާގައި ކުޅުނު މި މެޗުގެ ފުރަތަމަ ހާފު ނިމެން ދަނިކޮށް 43 ވަނަ މިނެޓުގައި ޑެންމާކަށް ލީޑު ނަގައިދިނީ ލިބުނު ޕެނަލްޓީއަކުން ޕިއޭ އެމީލް ހޮއިބިއާއެވެ. ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން ނުކުތް ރަސްމުސް ހޮއިލުންޑް ވަނީ އިތުރު ދެ ލަނޑު ޖަހައި ޑެންމާކުގެ ލީޑު ފުޅާކޮށްދީފައެވެ.
ޑެންމާކުގެ ހަތަރުވަނަ ލަނޑު ޔަކީމް އެންޑަސަން ކާމިޔާބުކޮށްދިންއިރު، މުޅި މެޗުގައި ވެސް ޕޯޗުގަލްއަށް ޖެހުނު ހަމައެކަނި ލަނޑު މެޗުގެ އިތުރު ވަގުތުގެ ތެރޭގައި ޖަހައިދިނީ ބެނާޑޯ ސިލްވާއެވެ.
ރޭގެ މެޗުން ބަލިވި ނަމަވެސް، މީގެ ކުރިން ދެ ފަހަރު ނޭޝަންސް ލީގު ކާމިޔާބުކޮށްފައިވާ ޕޯޗުގަލް ވަނީ ފުރަތަމަ ހަތަރު މެޗުން މޮޅުވެ، 12 ޕޮއިންޓް ހޯދައިގެން މި ފަހަރުގެ މުބާރާތުގެ ކުއާޓާ ފައިނަލުގެ ޖާގައެއް ކުރިންސުރެ ކަށަވަރުކޮށްފައެވެ.
މި ގްރޫޕުގެ ތާވަލުގެ ދެވަނައިގައި އޮތް ޑެންމާކަށް ނުވަ ޕޮއިންޓް ލިބިފައިވާއިރު، ތިންވަނައިގައި އޮތް ނޯވޭއަށް ލިބިފައިވަނީ ހަ ޕޮއިންޓެވެ. އަދި ކުޅުނު ފަސް މެޗުން ލިބުނު ތިން ޕޮއިންޓާއެކު ތާވަލުގެ އެންމެ ފުލުގައި އޮތީ ވޭލްސްއެވެ.
ގްރޫޕް ސްޓޭޖުގެ ފަހު މެޗުތަކުގައި ޕޯޗުގަލް ނުކުންނާނީ ވޭލްސްއާ ދެކޮޅަށެވެ. އަދި ޑެންމާކް ބައްދަލުކުރާނީ ނޯވޭއާއެވެ.













