މުޖުތަމައުގައި އާންމުވަމުންދާ ޣީބަބުނުމާއި، މަލާމާތްކުރުމާއި، އާޑަފުރައްސާރަކުރުން ފަދަ އިސްލާމްދީނުގައި ނަހީކުރައްވާފައިވާ ނުބައި އަމަލުތަކާ ދުރުހެލިވެ، އެކަކު އަނެކެއްގެ ކަރާމާތާއި އަބުރު ރައްކާތެރިކުރާ ބަޔަކަށް ދިވެހިން ވާންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފިއެވެ.
ރައީސް މިކަމަށް ގޮވާލެއްވީ، ދިވެހިންގެ މެދުގައި އިހުތިރާމްކުރުމުގެ ސިފަ އަލުން އަށަގެންނެވުމަށް ސަރުކާރުން އިސްނަގައިގެން ކުރިއަށްގެންދާ ”އިހުތިރާމް އަދާކުރުމުގެ ގައުމީ މަޝްރޫއު“ އިފްތިތާހުކުރުމަށް މާފަންނު ޓްރެކް ދަނޑުގައި ބޭއްވި ހާއްސަ ޖަލްސާގައި ވާހަކަފުޅު ދައްކަވަމުންނެވެ.
މި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ދިވެހިރާއްޖެއަކީ ސައްތައިން ސައްތަ އިސްލާމީ ގައުމަކަށްވާއިރު، އިސްލާމްވަންތަކަމާއި ދިވެހިވަންތަކަމުގެ ހަގީގީ ރޫހަކީ އެކަކު އަނެކަކަށް އިހުތިރާމްކުރުމާއި ގަދަރުކުރުންކަން އަބަދުވެސް ހަނދާންކުރަންޖެހޭ ކަމަށެވެ.
މީގެއިތުރުން، އެކަކު އަނެކެއްގެ ލެޔާއި މުދަލާއި އަބުރު ރައްކާތެރިކުރުމުގެ މުހިންމުކަން ފާހަގަކުރައްވައި، އެއްވެސް މީހެއްގެ ގަދަރަށް އުނިކަމެއް އަންނާނެ ފަދަ އަމަލެއް ނުކުރުމަށް ސަމާލުވާންޖެހޭ ކަމަށް އެމަނިކުފާނު ވިދާޅުވިއެވެ.
އެގޮތުން، މީހުންނަށް އިހާނެތިކޮށް ހިތުމާއި، މީހުން ނުރުހޭފަދަ ވަނަންތައް ކިޔުމާއި، އެހެން މީހުން ދަށްކޮށްލުން ފަދަ ހުތުރު އާދަތަކުން މުޖުތަމައު އެއްކޮށް ސަލާމަތްކުރުމަށް އެންމެހައި ރައްޔިތުން އަޒުމް ކަނޑައެޅުމަށް ރައީސް ވަނީ އިލްތިމާސްކުރައްވާފައެވެ.













