ހޮރްމުޒް ކަނޑުއޮޅީގެ އިރުމަތީ ސަރަހައްދުން ދަތުރުކުރި ތެޔޮ ޓޭންކަރެއް ކަނޑުއަޑީގެ މައިނެއްގައި ޖެހި، އަލިފާނުގެ ހާދިސާއެއް ހިނގައިފި ކަމަށް އީރާނުގެ ކަނޑުގެ ސިފައިން ހާމަކޮށްފިއެވެ. މިއީ ވޭތުވެދިޔަ 24 ގަޑިއިރުގެ ތެރޭގައި އެ ސަރަހައްދުގައި މިފަދަ ހާދިސާއެއް ހިނގި ހަތަރުވަނަ ފަހަރެވެ. އީރާނުން ތުހުމަތުކުރާ ގޮތުގައި މި އުޅަނދު ދަތުރުކޮށްފައިވަނީ މަނާކޮށްފައިވާ ސަރަހައްދެއްގެ ތެރެއިންނެވެ.
މެދުއިރުމަތީގެ މަސްރަހު ގޯސްވަމުންދާ މި ދަނޑިވަޅުގައި، ގަތަރާއި ތުރުކީވިލާތުން ވަނީ ދެގައުމުގެ ދެމެދުގައި އެކުގައި ދިފާއުވުމުގެ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގެ ދަށުން، ދެ ގައުމުން ކުރެ ކޮންމެ ގައުމަކަށް ބޭރުގެ ހަތިޔާރު އެޅި ހަމަލާއެއް އަމާޒުވެއްޖެ ހިނދެއްގައި، އެކުގައި އެއްބައިވަންތަކަމާއެކު އެކަމާ ކުރިމަތިލުމަށް ވަނީ އެއްބަސްވެފައެވެ.
ހަމައެއާއެކު، އދ. އިން ހާމަކޮށްފައިވާ ގޮތުގައި މިދިޔަ ފެބްރުއަރީ މަހުން ފެށިގެން ހޮރްމުޒް ކަނޑުއޮޅިއާއި މެދުއިރުމަތީގެ ކަނޑުގެ ސަރަހައްދުތަކުގައި ހިނގި 134 ހާދިސާއެއްގައި މިހާތަނަށް ކަނޑުދަތުރުފަތުރުކުރާ 25 ފަޅުވެރިއަކު ވަނީ މަރުވެފައެވެ. މި ހާދިސާތަކާ ގުޅިގެން، އާންމު އުޅަނދުފަހަރަށް އަމާޒުކޮށް ދޭ ހަމަލާތައް ވަގުތުން ވަގުތަށް ހުއްޓާލުމަށް އދ. އިން ވަނީ އަނެއްކާވެސް ގޮވާލާފައެވެ.
މީގެ އިތުރުން، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނެފައިވަނީ، ބަހްރައިނަށް އަމާޒުކޮށް އީރާނުން ފޮނުވާލި ދެ ޑްރޯން ވައްޓާލާފައިވާ ކަމަށެވެ. މި ހާދިސާގައި އެއްވެސް މީހަކަށް އަނިޔާއެއް އަދި މުދަލަކަށް ގެއްލުމެއް ލިބިފައެއް ނުވެއެވެ. މި ޑްރޯންތައް ވައްޓާލާފައި މިވަނީ، ބަހްރައިންގައި ހުރި އެމެރިކާގެ ”އާރލީ ވޯނިންގ ރާޑާ“ އަކަށް ހަމަލާދީފައިވާނެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ކުރިން ބުނެފައިވަނިކޮށެވެ.













